نیشنل پارٹی وفد کا کوئٹہ میں گیس پریشر کی کمی پر جی ایم سوئی گیس سے ملاقات، سردی کے آغاز پر گیس پریشر کی کمی عوام کے ساتھ ناانصافی ہے، نیشنل پارٹی

کوئٹہ (این این آئی )نیشنل پارٹی کی رکن بلوچستان اسمبلی کلثوم نیاز بلوچ کی سربراہی میں پارٹی وفد نے جی ایم سوئی سدرن گیس کمپنی سے ملاقات کی، جس میں گیس پریشر کی کمی اور دیگر مسائل پر تفصیلی گفتگو ہوئی۔وفد میں نیشنل پارٹی کے مرکزی ترجمان علی احمد لانگو، نیاز بلوچ اور سلمہ قریشی شامل تھیں۔نیشنل پارٹی کے وفد نے کوئٹہ کے علاقوں کلی عالمو، کلی اسماعیل، کلی شابو برات سریاب سمیت دیگر نواحی علاقوں میں گیس پریشر میں کمی اور غیر اعلانیہ لوڈشیڈنگ کے سنگین مسائل پر گہری تشویش کا اظہار کیا۔وفد نے کہا کہ سردیوں کے آغاز میں ہی گیس پریشر کی کمی عوام کے لیے انتہائی تکلیف دہ ہے۔ بچے، خواتین اور بزرگ شدید مشکلات کا سامنا کر رہے ہیں۔ کوئٹہ جیسے سرد علاقے میں رات دس بجے گیس بند کرنا ناانصافی اور ناقص حکمتِ عملی ہے۔ شہریوں کو ریلیف دینا حکومت اور متعلقہ اداروں کی بنیادی ذمہ داری ہے۔جی ایم سوئی گیس نے وفد کو یقین دہانی کرائی کہ متاثرہ علاقوں میں گیس پریشر میں بہتری اور بلاتعطل فراہمی کو یقینی بنانے کے لیے ہر ممکن اقدامات کیے جائیں گے۔نیشنل پارٹی کے وفد نے امید ظاہر کی کہ ادارہ یقین دہانی پر عمل درآمد کرتے ہوئے کوئٹہ کے عوام کو درپیش مسائل کے فوری حل کے لیے عملی اقدامات کرے گا۔