وزیراعلیٰ بلوچستان کی حکومتی وفد کے ہمراہ نیشنل پارٹی قیادت سے ملاقات، 27 ویں آئینی ترمیم پر حمایت مانگ لی

تربت (نمائندہ انتخاب) وزیراعلیٰ بلوچستان میر سرفراز بگٹی وفاقی وزراءکے وفد کے ہمراہ تربت پہنچے جہاں انہوں نے نیشنل پارٹی کے مرکزی صدر ڈاکٹر عبدالمالک بلوچ اور پارٹی قیادت سے ملاقات کی۔ یہ ملاقات کئی گھنٹے جاری رہی جس میں 27ویں آئینی ترمیم کے حوالے سے تفصیلی تبادلہ خیال کیا گیا۔ حکومتی وفد وزیراعظم پاکستان کا خصوصی پیغام لے کر آیا تھا اور نیشنل پارٹی سے آئینی ترمیم کے حق میں حمایت کی درخواست کی گئی۔ تاہم پارٹی قیادت نے فوری طور پر کوئی حتمی مو¿قف اختیار نہیں کیا اور کہا کہ پارٹی مشاورت کے بعد اس حوالے سے فیصلہ کرے گی۔ واضح رہے کہ نیشنل پارٹی نے قبل ازیں 27ویں آئینی ترمیم کی مخالفت کی تھی اور اسے جمہوری اقدار کے منافی قرار دیا تھا۔ وزیراعلیٰ کے ہمراہ آنے والے وفد میں وفاقی وزراءطارق فضل چوہدری اور رانا ثناءاللہ شامل تھے، جبکہ ڈپٹی کمشنر کیچ بشیر احمد بڑیچ بھی موجود تھے۔ ملاقات میں نیشنل پارٹی کے مرکزی سیکرٹری جنرل و سابق سینیٹر میر کبیر محمد شہی، سینیٹر جان محمد بلیدی، ایم این اے پھلین بلوچ، ایم پی ایز خیر جان بلوچ، رحمت صالح بلوچ، سابق سینیٹر کہدا اکرم دشتی، حاجی فدا حسین دشتی، میر حمل بلوچ، واجہ ابوالحسن، ڈاکٹر نور بلوچ، محمد جان دشتی، میئر کیچ بلخ شیر قاضی، بجار بلوچ اور دیگر پارٹی رہنما بھی شریک ہوئے۔ سیاسی مبصرین کے مطابق یہ ملاقات بلوچستان کی سیاسی فضا میں ایک اہم پیش رفت ہے، جس کے اثرات آئندہ پارلیمانی فیصلوں اور صوبائی سیاسی اتحادوں پر پڑ سکتے ہیں۔ نیشنل پارٹی کی حتمی رائے آئندہ چند روز میں متوقع ہے۔