دہشتگردوں کا مکمل صفایا ناگزیر ہے، بلوچستان کا خون بہانے والوں کو دنیا کے کسی کونے میں چھپنے نہیں دیں گے، سرفراز بگٹی

کوئٹہ (ویب ڈیسک) بلوچستان حکومت نے بیرون ملک بیٹھے کالعدم تنظیموں کے دہشتگردوں کے خلاف گھیرا تنگ کرنے کا فیصلہ کر لیا۔ وزیر اعلیٰ بلوچستان سرفراز بگٹی کی زیر صدارت اعلیٰ سطحی اجلاس کا اعلامیہ جاری کر دیا گیا جس کے مطابق بیرون ملک بیٹھے کالعدم تنظیموں کے سربراہان، کمانڈرز اور 300 سے زائد دہشتگردوں کے خلاف گھیرا تنگ کرنے کا فیصلہ کیا گیا۔ اعلامیے کے مطابق اجلاس میں کالعدم تنظیموں کی قیادت کے خلاف مقدمات کی پراسیکیوشن تیز کرنے کی ہدایت کی گئی۔ وزیر اعلیٰ سرفراز بگٹی نے ہدایت کی کہ وفاقی وزارت داخلہ اور وزارت خارجہ کی مدد سے انٹرپول ریڈ نوٹس کی کارروائی تیز کی جائے۔ مزید کہا گیا کہ مقامی سہولت کاروں سے لے کر ان کی قیادت تک صوبائی ایکشن پلان کے تحت بھرپور کارروائی ہوگی، دہشتگرد نیٹ ورک کے خاتمے کیلئے سخت اور غیر معمولی اقدامات کی منظوری دی گئی، حکام نے بیرون ملک دہشتگرد قیادت کے رابطوں، کال ریکارڈنگز اور دیگر شواہد پیش کیے۔ اجلاس میں بیرون ملک دہشتگرد کمانڈرز اور مقامی سہولت کاروں کے خلاف فوری اور بھرپور کریک ڈاﺅن کا فیصلہ کیا گیا۔ سرفراز بگٹی نے کہا کہ دہشتگردی میں ملوث اندرون و بیرون ملک عناصر کے خلاف مو¿ثر کارروائی ناگزیر ہے، بلوچستان کا خون بہانے والوں کو دنیا کے کسی کونے میں چھپنے نہیں دیں گے، سیاسی لبادہ اوڑھے دہشتگرد تنظیموں کے بیرون ملک بیٹھے سربراہان کا اصل چہرہ سامنے لانا ذمہ داری ہے۔ انہوں نے ہدایت کی کہ انسداد دہشتگردی کے نئے قوانین کے تحت کارروائیاں تیز کی جائیں، محکمہ داخلہ صوبائی ایکشن پلان کے تحت قائم سیل کو مزید متحرک کرے، دہشتگرد تنظیموں کے سربراہان اور سہولت کاروں کی فہرست مرتب کر کے شواہد ریکارڈ کا حصہ بنائیں، ریکارڈ اور شواہد کو وفاق کی مدد سے بین الاقوامی فورم پر پیش کر کے قانونی کارروائی شروع کی جائے گی۔ ریاست کی رٹ چیلنج کرنے والے عناصر کا مکمل صفایا ناگزیر اور فیصلہ کن مرحلے میں داخل ہو چکا ہے۔ دہشتگردی کے پیچھے غیر ملکی آقاﺅں کے مقاصد بے نقاب ہوچکے ہیں۔ بلوچستان مزید کسی غیر ملکی ایجنڈے کا شکار نہیں ہوگا۔ ریاست کے دشمنوں کے خلاف زیرو ٹالرنس ہے آخری سہولت کار تک پیچھا کیا جائے گا۔ صوبے کے امن، عوام کی حفاظت اور ریاستی وقار پر کوئی سمجھوتہ نہیں ہوگا۔