آئین کے تحت گیس پر پہلا ہمارا حق، لوڈشیڈنگ غیر قانونی ہے، وزیراعلیٰ سندھ کا وزیراعظم کو خط
کراچی:وزیر اعلی سندھ مراد علی شاہ نے سندھ میں گیس کی بد ترین لوڈ شیڈنگ پر وزیر اعظم عمران خان کو خط لکھ دیا، وزیر اعلی نے خط میں وزیر اعظم کی توجہ سندھ میں گیس کی بد ترین لوڈ شیڈنگ کی جانب مبذول کرائی،وزیر اعلی کا کہنا تھا کہ سندھ میں گیس کی لوڈ شیڈنگ غیر قانونی ہے، آئین کے تحت پہلے سندھ کوگیس فراہم کرنی چاہیے، وزیر اعظم عمران خان قانون پر عمل درآمد کو ممکن بنائیں،خط کے متن میں وزیر اعلی نے کہا بد قسمتی سے جس صوبے میں 68 فی صد گیس پیدا ہو رہی ہے اسی صوبے کے گھریلو اور صنعتی صارفین گیس سے محروم ہیں،خط میں وزیر اعلی کا کہنا تھا کہ گیس کی گھریلو بندش کی وجہ سے کھانا پکانے اور دیگر امور متاثر ہو رہے ہیں تو صنعتوں کی گیس پریشر میں کمی کی وجہ سے یومیہ اجرت والے افراد بے روزگار ہو رہے ہیں،خط کے مطابق سندھ سے 2500سے 2600ایم ایم سی ایف ڈی گیس پیدا ہو رہی ہے، اور صوبے کو صرف 900سے 1000ایم ایم سی ایف ڈی گیس دی جا رہی ہے جو کہ آئین کے آرٹیکل 158کی بھی خلاف ورزی ہے،خط میں مراد علی شاہ نے کہا کہ سندھ کو 1500 سے 1600 ایم سی سی ایف ڈی گیس کی ضرورت ہے۔
