جنوبی لبنان پر اسرائیلی فضائی اور توپ خانے کے حملے وقفے وقفے سے جاری
تہران(مانیٹرنگ ڈیسک) لبنان کی نیشنل نیوز ایجنسی کے مطابق اسرائیلی لڑاکا طیاروں، توپ خانے کے دستوں اور زمینی افواج نے جنوبی لبنان کے کئی علاقوں پر حملے کیے ہیں۔، اتوار کی رات اسرائیلی لڑاکا طیاروں نے نبطیہ الفوقا کے علاقے ‘دیر’ میں ایک مکان کو نشانہ بنایا۔علی الطاہر اور کفر رمان کے علاقوں میں وقفے وقفے سے توپ خانے کی گولہ باری جاری ہے۔دریں اثنا، اسرائیلی افواج نے جنوبی قصبے ‘الطیبہ’ میں دھماکہ خیز مواد کے ذریعے عمارتوں کو تباہ کرنے کی کارروائی کی۔ اطلاعات کے مطابق اسرائیلی افواج نے ‘حدّاثہ’ قصبے میں کئی مکانات کو نذرِ آتش بھی کر دیا۔ اسرائیلی توپ خانے نے جنوبی لبنان میں ‘الدبشہ’ اور ‘علی الطاہر’ کی بلندیوں کے قریب علاقوں کے ساتھ ساتھ ‘منصوری’ قصبے پر بھی گولہ باری کی۔تازہ ترین حملوں کے نتیجے میں ممکنہ جانی نقصان یا مالی نقصان کی وسعت کے بارے میں فوری طور پر کوئی اطلاع دستیاب نہیں تھی۔اسرائیل نے 2 مارچ کو لبنان کے خلاف بڑے پیمانے پر جارحانہ کارروائی کا آغاز کیا تھا، جس کے دوران لبنانی شہری ہلاک اور زخمی ہوئے، دس لاکھ سے زائد افراد بے گھر ہوئے اور جنوبی لبنان کے کچھ حصوں پر اسرائیلی قبضہ بدستور برقرار ہے۔
