عالمی ادارہ صحت نے ایک اور کمپنی کی کرونا ویکسین کے استعمال کی منظوری دے دی

نیو یارک:عالمی ادارہ صحت نے ایک اور کمپنی کی کرونا ویکسین کے استعمال کی منظوری دے دی۔ تفصیلات کے مطابق عالمی ادارہ صحت نے عالمی وبا کرونا وائرس پر قابو پانے کی کوششوں کے سلسلے میں اہم فیصلہ کیا ہے۔ ڈبلیو ایچ او کی جانب سے جانسن اینڈ جانسن کمپنی کی ویکسین کو ایمرجنسی صورتحال میں استعمال کرنے کی اجازت دے دی گئی۔عالمی ادارہ صحت اس سے قبل بھی کچھ کمپنیوں کی ویکسین کو محفوظ قرار دے کر ان کے استعمال کی اجازت دے چکا۔ تاہم عالمی ادارہ صحت کی جانب سے ہی منظور کردہ برطانوی کرونا ویکسین ایسٹرا زینیکا کے استعمال کے نتیجے میں خون کی پھٹکیاں بننے کے واقعات کے بعد ڈنمارک، ناروے، آئس لینڈ اور اٹلی نے ویکسین کا استعمال عارضی طور پر روک دیا ہے۔ خون کی پھٹکیاں بننے کے واقعات 30 لاکھ افراد میں سے 20 میں سامنے آئے۔اس حوالے سے یورپی یونین کا کہنا ہے کہ ویکسین اور خون کی پھٹکیاں بننے کے درمیان کسی تعلق کی علامات نہیں ملیں۔ جبکہ عالمی ادارہ صحت نے بھی اس معاملے کو بڑا خطرہ قرار نہیں دیا۔ دوسری جانب امریکی کمپنی فائزر اور جرمن کمپنی بائیون ٹیک کی مشترکہ تیار کردہ کرونا ویکسین اس سے قبل لگائے گئے اندازوں سے زیادہ تحفظ فراہم کر رہی ہے۔فرانسیسی خبر رساں ادارے کے مطابق دوا ساز کمپنیوں کی جانب سے کہا گیا کہ فائز،بائیون ٹیک کی ویکسین علامات والے کرونا مریضوں میں 97 فیصد تک موثر ثابت ہوئی ہے۔فائز،بائیون ٹیک کا کہنا تھا کہ یہ نتائج اسرائیل کی ملک گیر ویکسین مہم کے دوران جمع کی گئی معلومات سے اخذ کیے گئے۔کمپنیوں کے مطابق اکٹھی کی گئی معلومات کے مطابق ویکسین بغیرعلامات والے مریضوں میں 94 فیصد تک موثرثابت ہوئی۔یاد رہے کہ اس سے قبل کے نتائج میں یہ ویکسین علامات والے مریضوں میں 94 اور بغیر علامات والے مریضوں میں 92 فیصد تک موثر نتائج دے رہی تھی۔