اٹھارویں ترمیم کا ڈھنڈورا پیٹنے والے نہ جانے کہاں غائب ہیں، سینٹر فیصل جاوید

اسلام آباد:پاکستان تحریک انصاف کے سینیٹر فیصل جاوید نے کہاہے کہ اٹھارویں ترمیم کا ڈھنڈورا پیٹنے والے نہ جانے کہاں غائب ہیں۔ ہفتہ کو اپنے بیان میں سینٹر فیصل جاوید نے کہاکہ تمام صوبے خود مختار ہیں، اپنا اپنا کام کر رہے ہیں مگر سندھ کام نہیں کر رہا، بلاول زرداری کھوکھلے نعروں سے آگے نہیں بڑھ پا رہے، سندھ کی دیہی آبادی انتہائی غربت میں ہے، سندھ کے غریبوں کے لئے بھی پیکیج صرف وفاق نے دیا ہے۔سینٹر فیصل جاوید نے کہاکہ اور تو اور بلاول کو سندھ کے دارالخلافہ کراچی کا بھی کچھ پتا نہیں، محلات میں رہنے والے بلاول کیا کبھی مچھر کالونی گئے ہیں؟ کیا بلاول کو لیاری میں رہنے والوں کے حال کا کچھ علم ہے، کام عملی اقدامات اٹھانے سے ہوتے ہیں، پریس کانفرنسز یا ٹویٹس کردینے سے نہیں۔سینٹر فیصل جاوید نے کہاکہ ہاتھ جوڑ کر کہتے ہیں کہ خدارا غریب عوام پر رحم اور ان کا احساس کریں، وہ احساس جو وزیراعظم عمران خان کے ہر فیصلے ہر اقدام سے نمایاں جھلک رہا ہے، وزیراعظم غریبوں کیلئے ملکی تاریخ کا سب سے بڑا ریلیف پیکیج دے رہے ہیں۔