اسلام آباد اور راولپنڈی کے درمیان ہمیشہ پل کا کردار ادا کیا، شہباز شریف

لاہور (انتخاب نیوز) مسلم لیگ ن کے صدر اور قومی اسمبلی میں قائد حزب اختلاف شہباز شریف نے کہا ہے کہ ہمارے کسی بھی رکن اسمبلی کو اب تک کہیں سے بھی کوئی فون کال نہیں آئی ہے۔مجھے اپنی پارٹی یا اپوزیشن جماعتوں کی قیادت کی طرف سے ابھی تک کوئی ایسی اطلاع نہیں کہ کسی کو فون کال آئی ہو۔ شہباز شریف نے کہاہے کہ پی ٹی آئی نے احتساب کے نام پرانتقام لیا، عمران خان کوالگ نہ کیا گیا تو پاکستان کا وجود خطرے میں پڑجائے گا، ہم فوری طور پر شفاف انتخاب چاہتے ہیں۔انہوں نے مزید کہا کہ خواہش ہے فوری طورپرشفاف انتخابات ہوں، الیکشن میں قوم جس کو مینڈیٹ دے گی اس کااحترام کریں گے جب کہ وزارت عظمی کا فیصلہ نواز شریف ہی کریں گے۔انہوں نے کہا کہ اسلام آباداورراولپنڈی کے درمیان ہمیشہ پل کا کرداراد اکیا،یہ تعلقات صرف نواز شریف اور میرے فائدے کیلئے نہیں بلکہ ملک وقوم کے مفاد میں رہے ہیں۔ نئے آرمی چیف کی تعیناتی یا توسیع سے متعلق ملکی مفادمیں فیصلہ کریں گے۔شہباز شریف کا یہ بھی کہنا تھا کہ معیشت،خارجہ پالیسی کیلئے قومی حکومت ایک ٹرم کیلئے بنائی جائے۔شہباز شریف نے کہا کہ قائد اعظم کا پاکستان کیلئے جو خواب تھا جس کیلئے ہزاروں لاکھوں مسلمانوں نے قربانیاں دیں، وہ ابھی تک شرمندہ تعبیر نہیں ہوا۔ وہ خواب تھا کہ پاکستان معرض وجود میں آئے گا اور دنیا میں ایک مقام حاصل کرے گا، ہر سیکٹر میں آگے بڑھے گا۔حکومت کی کرپشن اور نااہلی نے پاکستان معیشت کو تباہ کردیا ہے، عمران خان کی ناک نیچے کرپشن ہورہی ہے لیکن وہ خود کو ایماندار کیسے کہہ سکتا ہے؟انہوں نے کہا کہ میری خواہش ہے کہ الیکشن کے بعد ہمیں تین چار چیزوں پر اکٹھے ہوجانا چاہیے جیسا کہ غربت کے خاتمے، معیشت اور خارجہ پالیسی کیلئے ایک ٹرم کیلئے قومی حکومت بنائی جانی چاہیے۔تحریک انصاف کی حکومت نے احتساب کے نام پر انتقام لیا،جھوٹے کیسز بنائے گئے، نیب نیازی گٹھ جوڑ کو توڑ دیں گے۔