محمود خان اچکزئی کا بیانیہ ملک کو بحرانوں سے نکال سکتا ہے،پشتونخوامیپ
کوئٹہ : پشتونخواملی عوامی پارٹی کے رہنماؤں نے کہا ہے کہ پارٹی کے عہدیداروں اور کارکنوں نے پارٹی کانگرس کے اہداف کے حصول کیلئے اپنی صلاحیتوں کو بروئے کار لاکر پارٹی کو ہر سطح پر وسیع اور منظم کرنے کیلئے دن رات محنت کرنی ہوگی اور ابتدائی یونٹوں کے انتخابی کانفرنسوں کے ہدف کو فوری طور پر حاصل کرنے کیلئے مسلسل کام کرنا ہوگا اور ابتدائی یونٹوں کے کانفرنسوں کے بعد علاقائی کانفرنسوں کے انعقاد کی تیاریاں بھی شروع کرنی ہوگی۔ اور پارٹی عہدیداروں اور کارکنوں نے ہر سطح پر منفی رویہ اور منفی طرز عمل کو ترک کرکے حوصلہ مندی اور برداشت کی جذبے کو اپنا کر اعلیٰ انسانی اسلامی اور پشتنی اقدار کے مطابق عوام کی خدمت کرنی ہوگی۔ان خیالات کا اظہار پشتونخواملی عوامی پارٹی کے صوبائی سینئر نائب صدرمحمد عیسیٰ روشان، صوبائی نائب صدر یوسف خان کاکڑ، صوبائی سیکرٹری ایم پی اے نصراللہ خان زیرے،پارٹی کے صوبائی ڈپٹی سیکرٹریز سید عبدالقادر آغا، خوشحال خان کاسی اور ضلعی ایگزیکٹوز کے اراکین نے ضلع کوئٹہ کے ضلعی ایگزیکٹو اورضلعی کمیٹی کے ماہانہ اجلاسوں سے خطاب کرتے ہوئے کیا۔ اجلاسوں کی صدارت پشتونخواملی عوامی پارٹی کے صوبائی سیکرٹری ایم پی اے نصراللہ خان زیرے نے کی۔
