عبدالخالق بابڑ سپرد خاک، خوست احتجاجی دھرنا کمیٹی کے مطالبات تسلیم کیے جائیں، پشتونخوا میپ

کوئٹہ (انتخاب نیوز) پشتونخواملی عوامی پارٹی کے صوبائی پریس ریلیز میں ضلع ہرنائی کے علاقہ خوست میں خالقداد بابڑ کی میت کے ہمراہ جاری احتجاجی دھرنے میں صوبائی اور وفاقی حکومت کی نمائندے اور وفد کی عدم شرکت کو انتہائی قابل افسوس اور قابل گرفت عمل قرار دیا گیا ہے۔ بیان میں کہا گیا ہے کہ گزشتہ روز احتجاجی دھرنا کے شرکاء نے عبدالخالق بابڑ کو سپرد خاک کردیا گیا اور اس واقعہ کیخلاف ہرنائی،شاہرگ خوست کے مقام پر نہ صرف شٹر ڈاؤن وپہیہ جام ہڑتال بلکہ عوام بالخصوص خواتین اور بچوں کی بڑی تعداد میں شرکت اور سیاسی کارکنوں نے سڑکوں پر نکل کر اپنا احتجاج ریکارڈ کرایا لیکن اس کے باوجود حکومت غیر سنجیدگی کا مظاہرہ کررہی ہے۔ بیان میں کہا گیا ہے کہ پشتونخواملی عوامی پارٹی نے بہت پہلے ہی ایف سی کی جانب سے پشتون سرزمین، ان کے معدنیات، وسائل پر قبضے کے استعماری عزائم کی نہ صرف نشاندہی کی بلکہ اس کیخلاف پر امن جمہوری احتجاجی تحریک چلائی اور تمام عوام کو فورسز کے ناروا اور عوام دشمن عزائم قبضہ گیری، بھتہ گیری، سویلین حکمرانی کے خاتمے، منی مارشل لاء نافذ کرنے پشتونوں کو اپنے ہی سرزمین اور وسائل سے مختلف حربوں کے ذریعے بیدخل کرنے،پشتون عوام کو ہر شعبہ زندگی میں بدترین حالات سے دوچار کرنے کی صورتحال سے بروقت آگاہ کیا تھا اب بھی عوام متحد ومنظم ہو کر فورسز کے جاری ظلم کیخلاف پر امن جمہوری احتجاج کے ذریعے اپنے آئینی حقوق اور قدرت کی جانب سے دیئے گئے وسائل جس کے مالک عوام ہیں کی دفاع اور اس کی تحفظ کرسکتی ہے۔ بیان میں کہا گیا ہے کہ خوست احتجاجی دھرنا کمیٹی کے تمام جائز مطالبات کو تسلیم کیا جائے اور وفاقی اور صوبائی حکومت پر زور دیا گیا ہے کہ وہ فورسز کی جانب سے پشتون عوام، ان کی سرزمین اور وسائل سے متعلق عوام دشمن عزائم وپالیسی کو ترک کرنے کیلئے انتہائی سنجیدگی سے اقدامات اٹھائیں۔