پشین کو آفت زدہ قرادینے کے باوجود سیلاب زدگان بے یارو مددگار ہیں، اے این پی

کوئٹہ (انتخاب نیوز) عوامی نیشنل پارٹی کے رہنماں نے کہا ہے کہ ضلع پشین کو آفت زدہ قرادینے کے باوجود سیلاب زدگان بے یارو مددگار آسمان تلے زندگی گزارنے پر مجبور ہیں۔ حالیہ سیلابی ریلوں سے پہنچنے والے زیان سے قیمتی انسانی جانیں ضائع ساتھ ہی ساتھ انفرا اسٹرکچر مکمل طور پر تباہی کے دہانے کھڑا ہے، ضرورت اس امر کی ہے کہ وفاقی صوبائی حکومت بین الاقوامی برادری سیلاب زدگان کی فوری دادر سی کو یقینی بنائیں، ضلعی انتظامیہ مخصوص جماعت کی نشاندھی پر ریلیف دے رہی ہے، جو قابل مذمت فعل ہے جس کیخلاف بھر پورا آواز اٹھائی جائے گی۔ شمشاد کاکڑ کی موت کے حوالے سے جوڈیشل انکوائری میں تعطل پر تشویش ہے، حکام بالا کیے گئے اپنے وعدوں کی پاسداری کو یقینی بنائیں۔ فعال ومنظم تنظیم کے بغیر درپیش چیلنجز سے نبرد آزما ناممکن ہے، لہذا کارکن اور ذمہ داران آئین پر عملدرآمد کرتے ہوئے پارٹی فعالیت کیلئے تمام تر صلاحیتوں کو بروئے کار لائیں، معطل کیے گئے ساتھیوں کی بنیادی رکنیت بحال کردی گئی۔ ان خیالات کا اظہار عوامی نیشنل پارٹی کے صوبائی نائب صدر اصغرعلی ترین، ضلع پشین صدر عبدالباری کاکڑ، ضلعی جنرل سیکرٹری صادق کاکڑ نے باچاخان مرکز پشین میں ضلعی مجلس عاملہ کے اجلاس کے شرکا سے خطاب کے دوران کیا۔ اجلاس میں تنظیمی امور سے متعلق تفصیل سے غور و خوض ہوا، حالیہ بلدیاتی انتخابات کے دوران جن ساتھیوں کیخلاف ڈسپلن کی خلاف ورزی کی بنیاد پر ان کی بنیادی رکنیت معطل کی گئی تھی ان تمام ساتھیوں کو اپنی سابقہ پوزیشن پر بحال کردیا گیا۔ اجلاس میں اس عہد کا اظہار کیا گیا کہ تمام ساتھی بنیادی یونٹ تحصیل وضلع ذمہ داران آئینی ڈھانچے کے اندر رہتے ہوئے پارٹی فعالیت کیلئے کام کرتے رہیں گے۔