مسلمان بھی مسیحی برادری کی خوشیوں میں برابر کے شریک ہیں، قد وس بزنجو
کوئٹہ(انتخاب نیوز) وزیراعلیٰ بلوچستان میر عبدالقدوس بزنجو نے کرسمس کے موقع پر مسیحی برادری کو دلی مبارکباد دیتے ہوئے کہ اہے کہ حضرت عیسیٰ کے یوم پیدائش کی مناسبت سے منایا جانے والا یہ دن مسلمانوں کے لئے بھی مبارک ہے ۔ اپنے جاری کردہ پیغام میں وزیراعلیٰ نے کہا ہے کہ مسلمان بھی مسیحی برادری کی خوشیوں میں برابر کے شریک ہیں ،دنیا بھر کو تخریب کاری اور امن وامان کی صورت میں درپیش سنگین خطرات سے نمٹنے کے لئے حضرت عیسیٰ کے امن وسلامتی کے پیغام کو عام کرنے کی ضرورت ہے۔انہوں نے کہا کہ مسیحی برادری ملک وقوم کی تعمیر وترقی کے لئے اپنی تمامتر صلاحیتیں بروئے کار لارہی ہے ، حکومت صوبے میں آباد تمام اقلیتوں بشمول مسیحی برادری کے حقوق کے تحفظ کو یقینی بنارہی ہے۔انہوںنے کہا کہ ملازمتوں میں اقلیتوں کے لئے مختص کوٹہ پر عملدرآمد کیا جارہا ہے ۔مسیحی برادری سمیت بلوچستان میں بسنے والی تمام اقلیتوں کو اپنی مذہبی عبادات کی ادائیگی کی مکمل آزادی حاصل ہے ۔مسیحی برادری اپنی خوشیوں میں ان افراد کو بھی شریک رکھے جو کرسمس منانے کی استطاعت نہیں رکھتے ۔مسیحی برادری اپنی عبادات میں ملک وقوم کے استحکام اور خوشحالی کے لئے خصوصی دعائیں مانگیں۔
