عراقی فورسز کی بڑی کارروائی، تخریب کاروں کے 25 ٹھکانے تباہ
بغداد (آئی ین پی) عراق میں مشترکہ آپریشنز کمانڈ نے ملکی افواج کی انسداد تخریب کاری کارروائیوں کے دوران تخریب کار عناصر کے 25 ٹھکانوں کا پتہ لگا کر انہیں تباہ کر دیا۔ غیر ملکی میڈیا کے مطابق عراق کی جوائنٹ آپریشنز کمانڈ نے کہا ہے کہ طوزخورماتو، کرکوک اور دیالی میں انسداد تخریب کاری کے وسیع آپریشن کے دوران تخریب کار گروہ داعش کے کم از کم 25 اڈوں کی نشاندہی کرکے انہیں تباہ کردیا گیا ہے۔ عراق کی مشترکہ آپریشنز کمان کی طرف سے جاری کردہ بیان میں کہا گیا ہے کہ مذکورہ آپریشن کے دوران متعدد دستی بم، مارٹر اور دیگر ہتھیار ضبط کر لئے گئے۔ انسداد تخریب کاری کی اس کارروائی میں فوج، عوامی رضا کار فورس حشد الشعبی اور وزارت داخلہ کی فورسز نے ملٹری انٹیلی جنس محکموں کی حمایت اور عراقی فوج کے جوائنٹ چیفس آف اسٹاف اور دیگر فیلڈ کمانڈروں کی موجودگی میں حصہ لیا۔ ہفتے کے روز عراقی فوجی حکام نے داعش کے عناصر کیخلاف قانونی چارہ جوئی کے لیے ملک کے تین صوبوں میں "سوارڈز آف رائٹ” آپریشن کے پانچویں مرحلے کے آغاز کا اعلان کیا تھا۔
