باجوڑ دھماکہ، چینی صدر کا صدرعارف علوی سے اظہار تعزیت
بیجنگ(مانیٹرنگ ڈیسک)چینی صدر شی جن پنگ نے صوبہ خیبرپختونخوا کے ضلع باجوڑ کے صدر مقام خار میں ہونے والے خودکش بم دھماکے پر پاکستانی صدرڈاکٹر عارف علوی سے اظہار تعزیت کیا ہے ۔بدھ کے روز چینی میڈ یا کے مطا بق چینی صدر شی جن پنگ نے کہا کہ انہیں خودکش بم دھماکے کے واقعے کے بارے میں جان کر دکھ ہوا ، جس میں بھاری جانی نقصان ہوا۔ انہوں نے چینی حکومت اور چینی عوام کی جانب سے بم دھماکے میں جاں بحق افراد کے لواحقین سے دلی تعزیت کا اظہار کیا۔ چینی صدر شی جن پنگ نے زور دے کر کہا کہ چین ہر قسم کی دہشت گردی کی مخالفت کرتا ہے، اس حملے کی شدید مذمت کرتا ہے اور انسداد دہشت گردی کے قومی ایکشن پلان کو فروغ دینے اور علاقائی اور عالمی امن و سلامتی کے مشترکہ تحفظ کے لیے پاکستان کی بھرپور حمایت جاری رکھے گا۔ جبکہ چینی وزیراعظم لی چھیانگ اور وزیر خارجہ وانگ ژی نے بھی اپنے پاکستانی ہم منصبوں کو تعزیتی پیغام بھیجوایا ہے۔
