عوام گرانفروشوں کی شکایت کریں، اشیا خورونوش کی قیمتوں میں استحکام لائیں گے، کمشنر کوئٹہ

کوئٹہ (انتخاب نیوز) کمشنر کوئٹہ ڈویژن محمد حمزہ شفقات اور ڈی سی کوئٹہ کی اہم پریس کانفرنس۔ اس موقع پر کمشنر کوئٹہ ڈویژن محمد حمزہ شفقات نے کہا کہ چینی کی قیمتوں میں بڑی کمی آئی ہے، گرانفروشوں کیخلاف انتظامیہ کی کارروائیاں جاری ہیں۔ 12 سو ٹن چینی ضبط کی گئی ہے، منی لانڈرنگ کیخلاف ایف آئی اے کارروائی کررہی ہے۔ کوئٹہ ڈویژن میں چینی کی قیمت اس وقت 160 روپے ہے۔ عوام کو اگر 160 روپے سے مہنگی چینی مل رہی ہو تو فوری طور پر ڈی سی آفس کو مطلع کریں۔ کوئٹہ ڈویژن میں آٹے کی قیمتیں مستحکم ہیں، پنجاب اور کوئٹہ کی قیمتیں ایک جیسی ہیں۔ انتظامیہ کا اگلا ٹاسک دودھ، گوشت اور چکن کی قیمتوں کو مستحکم کرنا ہے۔ چینی کے بعد اب دیگر اشیا کی قیتموں کے بارے کارروائیاں کی جائیں گی۔ کم اور غیر معیاری پیٹرول دینے والے 3 پمپ سیل کردیے گئے ہیں۔ 10 ایکڑ کے قریب زمین پر گندے نالے کے پانی سے اگائی جانیوالی سبزیوں اور فروٹ کی فصل کا ضائع کردیا گیا ہے۔ کوئٹہ، قلعہ عبداللہ، پشین میں منشیات کیخلاف بھرپور آپریشن جاری ہے۔ آج سے کوئٹہ میں بھی منشیات کیخلاف آپریشن شروع کردیا گیا ہے۔