مخصوص نشستوں کا معاملہ، سپیکر اور ڈپٹی سپیکر کے پی کے کو حلف نہ لینے پر نوٹس ، جواب طلب
پشاور(مانیٹرنگ ڈیسک)پشاور ہائیکورٹ میں اپوزیشن جماعتوں نے توہین عدالت درخواست دائر کی تھی جس پر جسٹس ایس ایم عتیق شاہ اور سید ارشد علی نے سماعت کی، دوران سماعت وکیل درخواست گزار نے کہا کہ عدالت نے مخصوص نشستوں پر منتخب ممبران اسمبلی سے حلف لینے کا حکم دیا تھا، عدالتی احکامات کے باوجود اپوزیشن کی مخصوص نشستوں پر حلف نہیں لیا گیا، وکیل درخواست گزار نے کہا کہ سپیکر اور ڈپٹی سپیکراسمبلی نے عدالتی احکامات کی خلاف ورزی کی، لہذا سپیکر اور ڈپٹی سپیکر کے خلاف توہین عدالت کی کارروائی کی جائے، عدالت نے ریمارکس دیئے کہ آئندہ سماعت پر سپیکر اور ڈپٹی سپیکر جواب جمع کرائیں، عدالت نے سپیکر اور ڈپٹی سپیکر خیبرپختونخوا اسمبلی کو نوٹس جاری کردیا۔ایک روز قبل خیبر پختونخوا اسمبلی کی مخصوص نشستوں پر ممبران سے حلف نہ لینے کے معاملے پر منتخب ارکان نے پشاور ہائیکورٹ میں توہین عدالت کی درخواست دائر کی تھی، یاد رہے کہ 27 مارچ کو پشاور ہائی کورٹ نے مخصوص نشستوں پر حلف برداری کے کیس میں اپوزیشن ممبران کی درخواست منظور کرتے ہوئے سپیکر کو ممبران سے حلف لینے کا حکم دے دیا تھا۔
