تعلیمی اداروں میں چند طلبہ کے منشیات ٹیسٹ کرینگے، شرجیل میمن

کراچی (صباح نیوز)صوبائی وزیر سندھ شرجیل میمن نے کہا ہے کہ سندھ میں پنجاب کی طرح ہتک عزت سے متعلق قانون پر کوئی بات نہیں ہورہی ۔نجی ٹی وی سے گفتگو کرتے ہوئے شرجیل میمن نے کہا کہ کچھ طلبہ کے رینڈم منشیات ٹیسٹ کریں گے اور نام راز میں رکھا جائے گا ،اگر کسی طالبعلم کا ڈرگ ٹیسٹ مثبت آتا ہے تو اس کے والدین سے بات کریں گے اور اس سٹوڈنٹ سے پوچھیں گے کہ یہ منشیات کس نے دی۔شرجیل میمن نے کہا کہ مجھے معلوم ہے ابتدائی طور پر تعلیمی اداروں میں ڈرگ ٹیسٹ پر تنقید ہوگی، کسی سٹوڈنٹ کا ڈرگ ٹیسٹ مثبت آتا ہے تو اس کا مطلب یہ نہیں کہ اس کیخلاف قانونی کارروائی کی جائیگی۔انہوں نے کہا کہ کے الیکٹرک کو چاہیے جو بل ادا نہیں کررہا صرف اس کی بجلی کاٹی جائے، پورے محلے کو سزا نہ دی جائے، آپ مجموعی طور پر صارفین کو سزا نہیں دے سکتے۔ شرجیل میمن نے کہا کہ کے الیکٹرک کو چاہیے کہ اپنی کارکردگی بہتر کرے۔ا نہوںنے کہا کہ پنجاب کا ہتک عزت کا قانون میں نے ابھی تک پڑھا نہیں، سندھ میں پنجاب کی طرح ہتک عزت سے متعلق قانون پر کوئی بات نہیں ہورہی۔