اقوام متحدہ کے ورلڈ فوڈ پروگرام کا غزہ کے تمام کراسنگ پوائنٹس کھولنے کا مطالبہ

روم (صباح نیوز)اقوام متحدہ کے ورلڈ فوڈ پروگرام نے غزہ کے تمام کراسنگ پوائنٹس، خاص طور پر پٹی کے مرکز اور جنوب میں موجود تمام راہ داریاں فوری کھولنے کا مطالبہ کیا ہے۔یو این کے ورلڈ فوڈ پروگرام نے ایک بیان میں کہا ہے کہ رفح میں اسرائیلی دراندازی کا شہریوں اور انسانی بنیادوں پر کارروائیوں پر تباہ کن اثر پڑا ہے۔ یہ کہ نقل و حرکت پر سخت پابندیوں کے باعث شہر میں جنگ سے متاثرہ افراد کی مدد نہیں کی جا سکتی۔انہوں نے مزید کہا کہ انسانی ہمدردی کی تنظیمیں جنگ، ناقابل استعمال سڑکوں، نہ پھٹنے والے اسلحہ، ایندھن کی قلت، چوکیوں اور اسرائیلی پابندیوں کی وجہ سے خاص طور پر کارم ابو سالم کراسنگ سے امداد تک رسائی کے لئے جدوجہد کر رہی ہیں۔پروگرام میں اسرائیلی حکام سے اپیل کی گئی کہ وہ کارم ابو سالم میں داخل ہونے والے انسانی امدادی سامان کی وصولی اور ترسیل میں سہولت فراہم کریں۔انہوں نے نشاندہی کی کہ اگرچہ کچھ تجارتی سامان غزہ پہنچ چکا ہے، لیکن لوگ زیادہ قیمتیں برداشت نہیں کر سکتے۔رفح میں اب بھی لوگوں کے لئے ہم بہت کچھ کر سکتے ہیں۔سڑکیں غیر محفوظ ہیں، رسائی محدود ہے اور ہمارے بیشتر شراکت دار اور دیگر انسانی ایجنسیاں بے گھر ہو چکی ہیں۔عالمی ادارہ خوراک نے کہاکہ جنوبی غزہ میں مزید امداد پہنچانے کرانے کی ضرورت ہے کیونکہ لوگوں کو خوراک ،صحت کی دیکھ بھال اور پانی تک رسائی میں مشکلات کا سامنا ہے۔