سندھ کی طرح بلوچستان میں بھی صحت کی سہولیات عام کریں گے، بلاول بھٹو

ویب ڈیسک(مانیٹرنگ ڈیسک)چیئرمین پیپلز پارٹی بلاول بھٹو زرداری نے کوئٹہ میں نیوز کانفرنس کرتے ہوئے کہا ہے کہ ،تخریب کاری کے حوالے سے پیپلز پارٹی کا موقف واضح ہے۔وزیراعظم نے امن وامان کی صورتحال پر اے پی سی بلائی ہے ،پیپلز پارٹی اے پی سی میں ضرورشرکت کرے گی ،اے پی سی میں بلوچستان کے حوالے سے بھی موقف رکھیں گے ۔انہوں نے کہا کہ بلوچستان کا دورہ کامیاب رہا،وزیراعلی بلوچستان نے منصوبوں کے بارے میں تفصیلی بریفنگ دی ،مجھے بلوچستان میں عہدیداروں اور ورکرز سے ملنے کا موقع ملا۔بلوچستان کے محدود وسائل سے عوام کو ریلیف فراہم کرنے کی کوشش کریں گے ،وزیراعلی کا ا سکالر شپ کا انیشیٹو اور خواتین کی نمائندگی سے متاثر ہوا ہوں ،اسکالر شپ انیشیٹو میں نوجوانوں کو پڑھائی اور آگے بڑھنے میں مدد مل سکتی ہے۔بلاول کا کہنا تھا کہ پیپلز پارٹی نے سندھ میں بہت کام کیا ہے ،چاہتے ہیں بلوچستان کے صحت کے نظام میں بھی بہتری لائیں ،وزیراعلی بلوچستان نے صوبے کے صحت کے بجٹ میں اضافہ کیا ہے ،پبلک پرائیویٹ پارٹنرشپ سے ملکر سندھ میں ہسپتالوں پر کام کیا ہے۔پبلک پرائیویٹ پارٹنرشپ سے اسپتالوں کو اپ گریڈ کرنے کی کوشش کریں گے ،سندھ کی طرح بلوچستان میں بھی صحت کی سہولیات عام کریں گے ،دل کے امراض کے اسپتالوں کو اپ ڈیٹ کریں گے ،جیسے کراچی میں این آئی سی وی ڈی بنا ایسا ادارہ کوئٹہ میں بھی بننا چاہیے۔معاشی بحران میں عوام کا مسئلہ غربت ، مہنگائی اور بیروزگاری ہے ،بلوچستان میں اسکل ڈیویلپمنٹ پر فوکس کیا جا رہاہے ،بلوچستان میں 2سال میں 30ہزار نوجوانوں کو اسکلز فراہم کریں گے۔