غزہ میں شہریوں کی اموات کی تعداد ناقابل قبول حد تک زیادہ ہیں، امریکا

واشنگٹن(صباح نیوز)امریکی وزیر خارجہ انٹونی بلنکن نے 2 اعلی اسرائیلی حکام کو بتایا کہ اسرائیل کی جانب سے محصور غزہ پٹی پر بمباری میں ناقابل قبول حد تک شہریوں کی امواتیں ہوئی ہیں۔ اسرائیلی فوج نے حالیہ دنوں میں کئی مہلک حملے کیے ہیں جن میں ایک پناہ گزین کیمپ اور اقوام متحدہ کے زیر انتظام متعدد اسکولوں پر بھی حملہ شامل ہے جہاں عام شہری پناہ لیے ہوئے تھے۔ اس حملے کے جواب میں حماس نے کہا کہ وہ جنگ بندی کے مذاکرات سے دستبردار ہو رہی ہے، جس کی وجہ سے جنگ بندی اور یرغمالیوں کی رہائی کے معاہدے کے امکانات مزید کم ہو گئے ہیں۔ محکمہ خارجہ کے ترجمان میتھیو ملر نے صحافیوں کو بتایا کہ ہم اس تنازع میں بہت زیادہ عام شہریوں کی اموات کو دیکھ رہے ہیں، ان کا کہنا تھا کہ انٹونی بلنکن نے 2 بااثر اسرائیلی حکام اسٹرٹیجک امور کے وزیر رون ڈرمر اور قومی سلامتی کے مشیر زاچی ہانیگبی سے ملاقات کی تاکہ غزہ میں ہونے والی شہری امواتوں کے بارے میں ہماری شدید تشویش کا اظہار کیا جا سکے، اموات اب بھی ناقابل قبول حد تک زیادہ ہیں۔