افغانستان کے ساتھ بند تجارت کو فوری طور پر بحال کیا جائے، پی ٹی آئی نےمطالبات پیش کر دیے

اسلام آباد(مانیٹر نگ ڈیسک)پاکستان تحریک انصاف کے مرکزی رہنما اسد قیصر نے کہا ہے کہ بانی پی ٹی آئی عمران خان نے کال دی ہے کہ اپنی حقیقی آزادی کیلئے پوری قوم احتجاج کیلئے نکلے گی ۔انہوں نے کہا کہ آپ نے دیکھ لیا پاکستان میں آئین عملا معطل ہے ، ملک میں پارلیمان اور عدالت کی کوئی حثیت نہیں رہی ہے ، اس وقت ملک عملا جنگل کا نظارہ پیش کر رہا ہے۔تحریک انصاف کے رہنما نے کہا کہ ملک میں جس کے پاس ڈنڈا ہے اس کا قانون چل رہا ہے ، وطن عزیزاس وقت عملا جنگل کا نظارہ پیش کر رہا ہے۔انہوں نے مزید کہا کہ ملک میں پارلیمان اور عدالت کی کوئی حثیت نہیں رہی ہے، معتبر ادارے پارلیمان پر حملہ ہوتا ہے ، ایم این ایز کو گرفتارکیا جاتا ہے ۔مرکزی رہنما نے مزید کہا کہ ہمارے لیڈرعمران خان کو جیل میں رکھا گیا ہے، ان کے خلاف اب کوئی ایسا کیس نہیں ہے جس میں انہیں مزید جیل میں رکھا جا سکے۔ان کا مزید کہنا تھا کہ ملک میں کوئی سرمایہ کاری کیلئے تیار نہیں ہے ، کسان رل رہا ہے ، انڈسٹری بند ہو رہی ہیں ، حکمراں سب اچھا کا راگ الاپ رہے ہیں۔اسد قیصرنے اپنے مطالبات پیش کرتے ہوئے کہا کہ ہمارا پہلا مطالبہ ہے عمران خان سمیت تمام بے گناہ سیاسی قیدیوں کو فوری طور پر رہا کیا جائے ۔ان کا کہنا تھا کہ ہمارا دوسرا مطالبہ ہے کہ ہمارے چوری شدہ مینڈیٹ کو واپس کیا جائے ،تیسرا مطالبہ یہ ہے کہ ملک میں آئین اور قانون کا نفاذ کیا جائے ۔پاکستان تحریک انصاف کے مرکزی رہنما نے مزید کہا کہ ہمارا چوتھا مطالبہ ہے کہ پڑوسی ملک افغانستان کے ساتھ تجارت کی فوری بحالی کے انتظامات کئے جائیں ۔