کوئٹہ قمبرانی روڈ پر دکان اورجنگل پیرعلیزئی لیویز تھانے پر دستی بم حملہ

کوئٹہ(یو این اے)کوئٹہ سمیت بلوچستان بھر میں مختلف مقامات پر 4 زوردار دھماکے ہوئے، جن میں ایک دھماکا شالکوٹ تھانے کے علاقے کرانی روڈ پر اے ٹی ایف کی گاڑی کے قریب ہوا، جس کے نتیجے میں 6 اہلکار زخمی ہوئے جن میں سے 1 دم توڑ گیا۔ زخمیوں کو طبی امداد کے لیے بی ایم سی ہسپتال منتقل کیا گیا۔ پولیس کے مطابق دھماکا خیز مواد سڑک کنارے نصب کیا گیا تھا۔پولیس کے مطابق ہلکار کی شناخت سپاہی دلبر خان کے نام سے ہوئی تھی۔دوسرا واقعہ قمبرانی روڈ پر پیش آیا، جہاں نامعلوم افراد نے ایک موبائل کی دکان پر دستی بم سے حملہ کیا۔ پولیس ذرائع کے مطابق اس حملے میں کسی جانی یا مالی نقصان کی اطلاع نہیں ملی۔تیسرا دھماکا ایئرپورٹ روڈ کے علاقے کلی شابو میں سنا گیا، تاہم پولیس اور قانون نافذ کرنے والے ادارے اس کی نوعیت اور نقصانات کا تعین کر رہے ہیں۔ پولیس اور امدادی ٹیمیں جائے وقوعہ پر پہنچ کر تحقیقات میں مصروف ہیں۔جبکہ چوتھا دھماکہ قلعہ عبداللہ لیویز اسٹیشن جنگل پیرعلیزئی پر نامعلوم شرپسندوں نے دستی بم سے حملہ کیا، تاہم خوش قسمتی سے کوئی جانی نقصان نہیں ہوا۔ لیویز ذرائع کے مطابق حملہ آور واردات کے بعد فرار ہونے میں کامیاب ہوگئے۔ واقعے کے بعد سیکیورٹی فورسز نے علاقے کو گھیرے میں لے کر شواہد اکٹھے کرنا شروع کر دیے ہیں اور حملہ آوروں کی تلاش جاری ہے۔ پولیس اور لیویز حکام نے اس حملے کو امن و امان کی صورتحال خراب کرنے کی کوشش قرار دیا ہے اور کہا ہے کہ علاقے میں سیکیورٹی مزید سخت کر دی جائے گی۔