قلات میں کوچ پر فائرنگ سے 3 افراد جاں بحق، متعدد زخمی ہوگئے، شاہد رند

قلات (انتخاب نیوز) قلات کے علاقے نیمرغ کراس کے قریب نامعلوم افراد کی مسافر کوچ پر فائرنگ۔ پولیس ذرائع کے مطابق جائے وقوعہ سے ابتک 3 لاشیں اور 5 زخمیوں کو ڈی ایچ کیو ہسپتال منتقل کیا جاچکا ہے۔ مزید لاشیں اور زخمیوں کو بھی ڈی ایچ کیو ہسپتال منتقل کیا جارہا ہے۔ مسافر کوچ کراچی سے کوئٹہ جارہی تھی۔ ترجمان حکومت بلوچستان شاہد رند کا کہنا ہے کہ قلات کے علاقے نمرغ میں کراچی سے کوئٹہ آنے والی مسافر کوچ پر فائرنگ کا واقعہ رونما ہوا ہے۔ افسوسناک واقعے میں تین افراد جاں بحق جبکہ سات زخمی ہوئے۔ سیکورٹی ادارے، ضلعی انتظامیہ اور ریسکیو ٹیمیں فوری طور پر جائے وقوعہ پر پہنچ چکی ہیں۔ ڈی ایچ کیو ہسپتال قلات میں ایمرجنسی نافذ کر دی گئی ہے، سیکورٹی فورسز نے علاقے کو گھیرے میں لے لیا ہے اور سرچ آپریشن جاری ہے۔