آواران، فورسز کے آپریشن میں 3 دہشتگرد ہلاک،میجر شہیدہوگئے، آئی ایس پی آر

کوئٹہ(این این آئی)آئی ایس پی آر کے مطابق سیکیورٹی فورسز نے خفیہ اطلاعات پر16جولائی کو ضلع آواران میں دہشت گرد تنظیمــ’’ فتنہ الہندوستان ــ‘‘سے تعلق رکھنے والے دہشت گردوں کی موجودگی کی اطلاع پر انٹیلی جنس بیسڈ آپریشن کیا۔آپریشن کے دوران پاکستانی دستوں نے دہشت گردوں کے ٹھکانے کو موثر انداز میں نشانہ بنایا۔آئی ایس پی آر کا کہناہے کہ آپریشن کے نتیجے میں تین بھارتی اسپانسرڈ دہشت ہلاک ہو گئے تاہم شدید فائرنگ کے تبادلے میں میجر سید ربنواز طارق دشمن کا بہادری سے مقابلہ کرتے ہوئے جامِ شہادت نوش کر گئے۔ شہید میجر اپنے دستے کی قیادت فرنٹ لائن سے کر رہے تھے۔آئی ایس پی آر نے کہا ہے کہ علاقے میں کلیئرنس اور سینیٹائزیشن آپریشن جاری ہے تاکہ کسی بھی چھپے دہشتگرد کو ختم کیا جا سکے،پاکستان کی سیکیورٹی فورسز ملک سے بھارتی حمایت یافتہ دہشت گردی کے مکمل خاتمے کیلئے پرعزم ہیں اور ہمارے بہادر سپاہیوں کی قربانیاں اس عزم کو مزید مضبوط بناتی ہیں۔