ایف آئی اے بلوچستان کی کارروائیاں، انسانی اسمگلر سمیت حوالہ ہنڈی میں ملوث ملزمان گرفتار

کوئٹہ (این این آئی) ایف آئی اے کی تفتان میں کارروائی، بدنام زمانہ انسانی اسمگلر گرفتار کرلیا گیا۔ ترجمان ایف آئی اے کے مطابق ایف آئی اے اینٹی ہیومن ٹریفکنگ سرکل تفتان نے کارروائی کرتے ہوئے بدنام زمانہ انسانی ٹریفکر محمد عدنان اسلم کو گرفتار کرلیا۔ ترجمان کے مطابق ملزم عراق سے آپریٹ ہونے والے انسانی ٹریفکنگ کے منظم گینگ کا حصہ ہے، ملزم پاکستانی شہریوں کو ایران کے غیر قانونی راستوں سے عراق اسمگل کرتا تھا، مذکورہ گینگ نے عراق میں سیف ہاﺅسز بنا رکھے ہیں۔ ترجمان نے بتایا کہ ملزم دیگر ساتھیوں کی ملی بھگت سے شہریوں کو پاکستان سے غیر قانونی طریقے سے ایران کے راستے عراق لے کر جاتے تھے، ملزمان شہریوں کو عراق میں موجود سیف ہاﺅسز میں محصور کرتے تھے۔ ترجمان کے مطابق متاثرین کے گھر والوں کی جانب سے بھیجی گئی رقوم کے، ملزم کے موبائل سے انسانی اسمگلنگ کے شواہد برآمد اور منظم گینگ میں شامل انسانی اسمگلروں کی تفصیلات حاصل کر لی گئی ہےں جبکہ ملزمان کی گرفتاری کے لئے چھاپے مارے جارہے ہیں۔ علاوہ ازیں ایف آئی اے کمرشل بینکنگ سرکل کوئٹہ کی کارروائیاں، حوالہ ہنڈی اور غیر قانونی کرنسی ایکسچینج میں ملوث 3 ملزمان گرفتار۔ ترجمان ایف آئی اے کے مطابق ڈی جی ایف آئی اے رفعت مختار راجہ کی ہدایت پر حوالہ ہنڈی اور غیر قانونی کرنسی ایکسچینج میں ملوث نیٹ ورکس کے گرد گھیرا تنگ کرتے ہوئے کوئٹہ سے حوالہ اور ہنڈی میں ملوث ملزمان محمد عمر، لعل محمد اور عبدالولی کو گرفتار کرلیا گیا ہے ۔ترجمان کے مطابق ملزمان سے مجموعی طور پر 17 لاکھ روپے برآمد ہوئے ملزمان غیر قانونی کرنسی ایکسچینج میں بھی ملوث تھے۔ ترجمان کے مطابق ملزمان سے 4 موبائل فونز اور حوالہ ہنڈی سے متعلق پیغامات، رجسٹرز اور دیگر شواہد بھی برآمد کر لیے گئے ہیں ملزمان برآمد ہونے والی کرنسی کے حوالے سے حکام کو تسلی بخش جواب نہ دے سکے ملزمان کو گرفتار کر کے تفتیش کا آغاز کر دیا گیا ہے۔