بلوچستان بھر میں مسافر کوچوں میں سی سی ٹی وی کیمرے نصب اور مرکزی مانیٹرنگ سیل قائم کرنیکا فیصلہ

کوئٹہ (آئی این پی) سیکرٹری پروانشل ٹرانسپورٹ اتھارٹی بلوچستان وحید شریف عمرانی کی زیر صدارت مسافر کوچوں میں سی سی ٹی وی کیمرے نصب کرنے اور ریکارڈنگ محفوظ رکھنے کے حوالے سے ایک اہم اجلاس منعقد ہوا۔ اجلاس میں ٹرانسپورٹ یونین کے عہدیداران اور متعلقہ محکموں کے افسران نے شرکت کی۔اجلاس کے دوران صوبے بھر میں مسافر کوچوں کی سیکورٹی اور نگرانی کے نظام کو مزید موثر بنانے کے لیے مختلف تجاویز پر تفصیلی غور کیا گیا۔ شرکاء نے اس بات پر اتفاق کیا کہ سیکرٹری ٹرانسپورٹ بلوچستان اور محکمہ داخلہ کی ہدایت کی روشنی میں سی سی ٹی وی کیمروں کی تنصیب اور ریکارڈنگ کا مستقل نظام قائم کرنا ناگزیر ہوچکا ہے تاکہ مسافروں کے تحفظ کو یقینی بنایا جا سکے اور کسی بھی ناخوشگوار واقعے کی صورت میں فوری کارروائی ممکن ہو۔ اجلاس میں فیصلہ کیا گیا کہ صوبے کے تمام مسافر کوچوں میں جدید سی سی ٹی وی کیمرے نصب کیے جائیں گے اور ان کی ریکارڈنگ محفوظ رکھی جائے گی تاکہ مسائل کے حل کے حوالے سے استعمال کی جاسکے۔ اس کے علاوہ ٹرانسپورٹرز کو ہدایت کی گئی کہ وہ اپنے تمام کوچوں میں کیمروں کی تنصیب اور ان کی باقاعدہ مانیٹرنگ یقینی بنائیں۔ سیکرٹری پروانشل ٹرانسپورٹ اتھارٹی بلوچستان وحید شریف عمرانی نے اس موقع پر کہا کہ مسافروں کا تحفظ حکومت بلوچستان کی اولین ترجیح ہے۔ انہوں نے کہا کہ کیمرے اور ریکارڈنگ سسٹم کے نفاذ سے نہ صرف سیکورٹی میں بہتری آئے گی بلکہ حادثات، جرائم اور دیگر مسائل کی صورت میں آسانی پیدا ہوگی۔ انہوں نے مزید کہا کہ اس نظام کی موثر نگرانی کے لیے ایک مرکزی مانیٹرنگ سیل قائم کیا جائے گا جو کوچوں کی نقل و حرکت اور ریکارڈنگ کی باقاعدہ جانچ کرے گا۔ اجلاس کے اختتام پر ٹرانسپورٹ یونین کے نمائندوں نے اس فیصلے کا خیرمقدم کرتے ہوئے حکومت کو مکمل تعاون کی یقین دہانی کرائی۔ سیکرٹری ٹرانسپورٹ نے متعلقہ اداروں کو ہدایت کی کہ وہ اس فیصلے پر عملدرآمد کے لیے فوری اقدامات کریں تاکہ آنے والے چند ہفتوں میں یہ نظام صوبے بھر میں مکمل طور پر فعال ہوسکے۔