پنجگور میں فورسز سے مقابلے میں 3 دہشتگرد ہلاک، بلوچستان میں بدامنی پھیلانے والے ریاست دشمن عناصر کیلئے کوئی جگہ نہیں، وزیراعلیٰ سرفراز بگٹی

کوئٹہ (ویب ڈیسک) فوج کے شعبہ تعلقات عامہ (آئی ایس پی آر) کے مطابق سیکورٹی فورسز نے دہشت گردوں کی موجودگی کی اطلاع پر پنجگور میں کامیاب انٹیلی جنس بیسڈ آپریشن کیا۔ آپریشن کے دوران سیکورٹی فورسز نے دہشت گردوں کے ٹھکانے کو نشانہ بنایا، شدید فائرنگ کے تبادلے میں 3 دہشت گرد مارے گئے۔ دریں اثناءوزیراعلیٰ بلوچستان سرفراز بگٹی نے پنجگور میں سیکورٹی فورسز کی جانب سے کامیاب انٹیلی جنس بیسڈ آپریشن پر اطمینان کا اظہار کرتے ہوئے فورسز کی پیشہ ورانہ صلاحیتوں، جرات اور بروقت کارروائی کو سراہا ہے۔ اپنے ایک بیان میں وزیراعلیٰ نے کہا کہ بھارتی سرپرستی میں سرگرم دہشت گردوں کیخلاف یہ کامیاب کارروائی اس بات کا واضح ثبوت ہے کہ پاکستان کی سیکورٹی فورسز اور قانون نافذ کرنے والے ادارے ملک کے دفاع اور عوام کے تحفظ کے لیے ہمہ وقت تیار ہیں۔ انہوں نے کہا کہ دہشت گردی کے خلاف جنگ میں سیکورٹی فورسز کی قربانیاں ناقابلِ فراموش ہیں اور پوری قوم ان کے شانہ بشانہ کھڑی ہے، سرفراز بگٹی نے واضح کیا کہ بلوچستان میں بدامنی پھیلانے والے ریاست دشمن عناصر کے لیے کوئی جگہ نہیں، اور عوام کے جان و مال کے تحفظ کے لیے دہشت گردی کے خلاف کارروائیاں بلا تفریق اور پوری قوت کے ساتھ جاری رہیں گی۔ انہوں نے کہا کہ صوبائی حکومت سیکورٹی فورسز کے ساتھ مکمل تعاون جاری رکھے گی تاکہ امن و امان کو مزید مستحکم بنایا جاسکے۔ وزیراعلیٰ بلوچستان نے کہا کہ وفاقی ایپکس کمیٹی کے منظور کردہ نیشنل ایکشن پلان کے تحت عزم استحکام کے وژن پر عملدرآمد کرتے ہوئے غیر ملکی سرپرستی میں ہونے والی دہشت گردی کا مکمل خاتمہ یقینی بنایا جائے گا۔ انہوں نے اس عزم کا اعادہ کیا کہ بلوچستان میں پائیدار امن، ترقی اور خوشحالی کے لیے کسی بھی قربانی سے دریغ نہیں کیا جائے گا وزیراعلیٰ نے کامیاب آپریشن میں حصہ لینے والے سیکورٹی اہلکاروں کو خراج تحسین پیش کرتے ہوئے ان کے لیے نیک تمناﺅں کا اظہار کیا۔