بابر اور حیدر کی شاندار بیٹنگ، پاکستان نے زمبابوے کو دوسرے ٹی ٹوئنٹی میں شکست دے دی

پاکستان نے مہمان ٹیم کو 8 وکٹوں سے ہرایا، 3 ٹی ٹوئنٹی میچز کی سیریز میں گرین شرٹس نے 0-2 کی فیصلہ کن برتری حاصل کرلی
تین ٹی ٹوئنٹی میچوں کی سیریز کے دوسرے میچ میں پاکستان نے زمبابوے کو بآسانی 8 وکٹوں سے شکست دے دی۔
راولپنڈی میں کھیلے گئے دوسرے ٹی ٹوئنٹی میچ میں میزبان پاکستان نے ٹاس جیت کر پہلے فیلڈنگ کا فیصلہ کیا۔
زمبابوے کی جانب سے اننگزکا آغازبرینڈن ٹیلر اور چیبھا بھا نے کیا جو مایوس کن رہا اور دوسرے اوور میں ہی ٹیلر حارث رؤف کا شکار بن گئے۔
زمبابوے کی جانب سے برل اور ویسلے مدھیویرے ہی پاکستانی بولنگ کے سامنے مزاحمت کرسکے اور دونوں نے بالترتیب 32 اور 24 رنز کی اننگز کھیلیں۔ میزبان ٹیم مقررہ اوورز میں 7 وکٹوں کے نقصان پر 134 رنز بناسکی۔
پاکستان کی جانب سے حارث رؤف اور عثمان قادر نے 3 ، 3 کھلاڑیوں کو آؤٹ کیا۔
زمبابوے کے 135 رنز کے ہدف کے تعاقب میں گرین شرٹس کی جانب سے اننگز کا آغاز فخر زمان اور کپتان بابر اعظم نے کیا تاہم فخر زمان 5 رنز بناکر پویلین لوٹ گئے۔
اس کے بعد آنے والے حیدر علی اور بابر اعظم نے ذمہ دارانہ کھیل پیش کیا اور دوسری وکٹ کی شراکت میں 100 رنز بناکر ٹیم کی فتح میں اہم کردار ادا کیا۔
بابر اور حیدر نے نصف سنچریاں بنائیں تاہم نصف سنچری بنانے کے فوری بعد کپتان بابر اعظم آؤٹ ہوگئے۔
پاکستان نے 15 ویں اوور میں بآسانی 2 وکٹوں کے نقصان پر 135 رنز کا ہدف حاصل کرلیا اور یوں زمبابوے کو 8 وکٹوں سے شکست دی۔
اس جیت کے ساتھ ہی گرین شرٹس نے 3 میچوں کی سیریز میں 0-2 کی فیصلہ کن برتری حاصل کرلی۔
پاکستان کی جانب سے حیدر علی 66 رنز بناکر ناقابل شکست رہے جبکہ کپتان بابر اعظم 51 رنز بناکر نمایاں رہے۔