ٹیم 100 فیصد دینے کیلیے تیار، سیریز کا فاتحانہ اختتام کرنا چاہتے ہیں: فہیم اشرف
پاکستان کرکٹ ٹیم کے آل راؤنڈر فہیم اشرف کا کہنا ہے کہ دوسرا ٹیسٹ میچ جیت کر سیریز کا فاتحانہ اختتام کرنا چاہتے ہیں اور اس ٹیسٹ میچ کی اہمیت کے بارے سب کو علم ہے۔
پاکستان اور نیوزی لینڈ کی ٹیموں کے درمیان دوسرا ٹیسٹ اتوار سے کراٹسٹ چرچ کے ہیگلے اوول میں شروع ہو رہا ہے۔
قومی ٹیم کے آل راؤنڈر فہیم اشرف نے پہلے ٹیسٹ میچ کی پہلی اننگز میں 91 اور دوسری اننگز میں 19 رنز بنائے تھے۔
ہیگلے اوول کرائسٹ چرچ میں ٹریننگ سیشن کے موقع پر گفتگو کرتے ہوئے آل راؤنڈر فہیم اشرف نے کہا کہ یہ ایک نیا میچ اور نیا دن ہے، کرائسٹ چرچ کی کنڈیشنز ترنگا سے مختلف ہیں، اسی مناسبت سے ٹریننگ سیشن کیا، خاص طور بولنگ کے حوالے سے بات کی ہے کہ جلد وکٹیں حاصل کرنے کا فائدہ ہے اور یہ بتایا گیا ہے کہ جلد وکٹیں کیسے حاصل کرنی ہیں۔
انہوں نے کہا کہ سیریز کا آخری میچ ہمارے لیے بہت معنی رکھتا ہے، تمام کھلاڑی سیریز کا فاتحانہ اختتام کرنا چاہتے ہیں، اس کے لیے ہم 100 فیصد دیں گے، ٹیسٹ میچ جیتیں اور سیریز برابر کریں گے۔
فہیم اشرف نے کہا کہ ہم نے آخری میچ سے بہت سیکھا، اب غلطیاں نہیں دہرائیں گے، آج ٹریننگ سیشن میں کنڈیشنز کے مطابق بولنگ کرنے کی تیاری کی ہے۔