دنیا ہمیں یہ بتانا بند کردے کہ افغانستان کو کیسے چلانا ہے؟ سربراہ افغان حکومت

کابل (مانیٹرنگ ڈیسک) افغانستان میں نئی حکومت قائم ہونے کے بعد وزیر داخلہ کا عہدہ سنبھالنے والے سراج الدین حقانی کے بعد افغان حکومت کے امیر بھی پہلی بار منظر عام پر آگئے۔ میڈیا رپورٹس کے مطابق افغان حکومت کے سربراہ شیخ ہیبت اللہ اخوندزادہ پہلی بار دارالحکومت کابل پہنچے اور پہلی بار قومی جرگے میں شرکت کی۔ افغان حکومت کے امیر نے جرگے کے دوران پشتو زبان میں تقریباً ایک گھنٹے تک تقریر کی جسے صرف سرکاری ریڈیو پر نشر کیا گیا۔ انہوں نے حکومت کی پالیسیوں کا دفاع کرتے ہوئے کہا کہ افغان حکومت کو یہ حق حاصل ہے کہ وہ اپنے ملک میں مکمل اسلامی نظام نافذ کریں۔ انہوں نے کہا کہ دنیا افغان حکومت کو یہ بتانا بند کردے کہ افغانستان کو کیسے چلانا ہے؟ انہوں نے شرعی قوانین پر اصرار کرتے ہوئے کہا کہ کامیاب اسلامی ریاست کا یہ واحد نمونہ ہے۔ ان کا یہ بھی کہنا تھا کہ دنیا ہمارے معاملات میں مداخلت کیوں کررہی ہے؟ وہ کہتے ہیں تم یہ کیوں نہیں کرتے، تم ایسا کیوں نہیں کرتے؟ دنیا ہمارے کام میں مداخلت کیوں کرتی ہے۔ خیال رہے کہ افغان لویہ جرگہ افغانستان کے دارالحکومت کابل میں جمعرات کو شروع ہوا تھا، جو تین روز تک جاری رہا۔ جس میں تین ہزار سے زائد علما، سیاسی و سماجی اور کاروباری شخصیات نے شرکت کی۔