کرونا وبا نفرت کے سونامی کا سبب بن رہی ہے، اقوام متحدہ

نیویارک:اقوام متحدہ کے سیکرٹری جنرل انٹونیو گوٹیرش نے کہا ہے کہ نئے کورونا وائرس کی عالمگیر وبا نفرت کے سونامی کا سبب بن رہی ہے۔کئی ملکوں اور خطوں میں غیر ملکیوں اور مسلمانوں پر حملے ہوئے جبکہ مہاجرین و پناہ گزینوں کو اس وبا کی وجہ بھی قرار دیا جا رہا ہے۔ پوری دنیا کے سیاسی رہنماء تمام رنگ و نسل کے لوگوں کے ساتھ یکجہتی کا مظاہرہ کریں اور تعلیمی اداروں میں ڈیجیٹل تعلیم پر بھی زور دیں۔ غیرملکی خبررساں ادارے کے مطابق انہوں نے جمعہ کو جاری کردہ اپنے بیان میں خبردار کیا کہ موجودہ وبا کے دور میں اجنبیوں سے خوف، الزام تراشی اور خوف میں اضافہ ہو رہا ہے۔ گوٹیرش نے کہاکہ کئی ملکوں اور خطوں میں غیر ملکیوں اور مسلمانوں پر حملے ہوئے جبکہ مہاجرین و پناہ گزینوں کو اس وبا کی وجہ بھی قرار دیا جا رہا ہے۔ اقوام متحدہ کے سیکرٹری جنرل نے سیاسی رہنماؤں پر زور دیا کہ وہ تمام رنگ و نسل کے لوگوں کے ساتھ یکجہتی کا مظاہرہ کریں اور تعلیمی اداروں میں ڈیجیٹل تعلیم پر بھی زور دیں۔