مستونگ کھڈ کوچہ میں فورسز کے ہاتھوں 2 افراد کا قتل ماورائے آئین ہے، بلوچستان بار کونسل

کوئٹہ (انتخاب نیوز) بلوچستان بار کونسل کے وائس چیئرمین قاسم علی گاجزئی، چیئرمین ایگزیکٹیو کمیٹی ایوب ترین، ممبران بار کونسل راحب خان بلیدی ایڈووکیٹ اور امان اللہ کاکڑ نے اپنے ایک بیان میں مسونگ کے علاقے کھڈ کوچہ میں فورسز کیجانب سے ڈسٹرکٹ مسونگ میں ڈسٹرکٹ بار ایسوسی ایشن مسونگ کے نائب صدر چیف عطا ء اللہ کے گھر پر چھاپہ چادر اور چاردیواری کی پامالی اور فورسز کی جانب سے فائرنگ اور ان کے دو بھائیوں کو قتل کرکے ڈسٹرکٹ بار کے نائب صدر چیف عطا اللہ اور اس کے چچا ریٹائرڈ پرنسپل کو شدید زخمی کرکے اپنے ساتھ لے گئے بلوچستان بار کونسل اس واقعے کو ماورائے آئین و قانون واقعے کی شدید الفاظ میں مذمت کرتے ہوئے کہا کہ بلوچستان میں آئے روز فورسز کے ہاتھوں سے لوگوں کو لاپتہ کرنے کا سلسلہ جاری ہے، بلوچستان میں قتل و غارت لوگوں کو ماورائے آئین و قانون قتل لاپتہ کرنا انسانی حقوق کی سنگین خلاف ورزی ہے، بیان میں کہا گیا کہ اس قسم کے واقعات سے بلوچستان کے عوام کا ریاستی اداروں سے اعتماد اٹھتا جارہا ہے، کسی بھی شہری کا اگر کوئی جرم ہے تو انہیں عدالتوں میں پیش کیا جانا چاہیے۔ بیان میں کہا گیا کہ بلوچستان بار کونسل کی جانب سے مستونگ بار کے نائب صدر چیف عطاء اللہ کے گھر پر چھاپہ چادر اور چاردیواری کی پامالی ان کے دو بھائیوں کو قتل کرنے اور چیف عطاء اللہ اور اس کے ریٹائرڈ پرنسپل چچا کو زخمی کرکے لاپتہ کرنے کیخلاف کل 26 اگست بروز جمعہ کو بلوچستان بھر میں عدالتی کارروائی کے بائیکاٹ کا اعلان کیا ہے۔