حمزہ علی عباسی ’مولا جٹ‘ کے پریمیئر میں شریک کیوں نہ ہوئے؟

بلال لاشاری اور عمارہ حکمت کی فلم ‘دی لیجنڈز آف مولا جٹ‘ طویل انتظار کے بعد دنیا بھر میں ریلیز کردی گئی ہے۔فلم کے رنگا رنگ پریمئیر کا انعقاد لاہور کے کیو سنیما میں کیا گیا جہاں نامور اداکاروں سمیت فلم کی کاسٹ نے بھی شرکت کی۔البتہ کہانی میں مولا جٹ کے حریف نوری نتھ کا کردار نبھانے والے حمزہ علی عباسی پریمیئر میں نظر نہ آئے اور اس کی وجہ انہوں نے خود ہی بتائی ہے۔ٹوئٹر پر جاری بیان میں حمزہ علی عباسی نے کہا کہ وہ شدید بخار میں مبتلا ہونے کی وجہ سے پریمئیر میں شریک نہیں ہوسکے لیکن ان کی نیک تمنائیں سب کے ساتھ ہیں۔فلم کی کاسٹ میں فواد خان، ماہرہ خان، حمزہ علی عباسی، حمائمہ ملک، گوہر رشید اور دیگر شامل ہیں۔