نیٹ فلیکس میں پہلی بار اشتہارات کی آمد

(ویب ڈیسک)نیٹ فلیکس کی جانب سے اشتہارات پر مبنی ایک سستا پیکج متعارف کرانے کا اعلان کیا گیا ہے۔اشتہارات پر مبنی یہ پیکج ابتدائی طور پر 12 ممالک میں دستیاب ہوگا۔کمپنی نے اسے بیسک ود ایڈز کا نام دیا ہے اور یہ سب سے پہلے آسٹریلیا، برازیل، کینیڈا، فرانس، جرمنی، اٹلی، جاپان، کوریا، اسپین، برطانیہ اور امریکا میں نومبر سے دستیاب ہوگا۔کمپنی نے بتایا کہ اس پیکج کو لینے والے افراد 720 پکسل/ ایچ ڈی ویڈیو دیکھ سکیں گے جبکہ ہر گھنٹے 4 سے 5 منٹ کے اشتہارات دکھائے جائیں گے۔اسی طرح یہ صارفین ایپ سے ویڈیو کو ڈاؤن لوڈ نہیں کرسکیں گے جبکہ انہیں محدود فلموں اور ٹی وی شوز تک رسائی حاصل ہوگی۔خیال رہے کہ نیٹ فلیکس نے مئی میں ایک کم قیمت اشتہارات پر مبنی پیکج کا اشارہ دیا تھا اور جون میں اس کی تصدیق کی تھی۔اس پیکج کی قیمت ہر ملک میں مختلف ہوگی جیسے امریکا میں 7 ڈالرز، کینیڈا میں 6 ڈالرز جبکہ برطانیہ میں 4 یورو ہوگی۔کمپنی کے مطابق اس اپ ڈیٹ کو دیگر ممالک میں آنے والے مہینوں میں متعارف کرایا جائے گا۔