سال 2022 بیک وقت بہترین اور بدترین تھا، عمران خان

لاہور (انتخاب نیوز) چیئر مین پاکستان تحریک انصاف اور سابق وزیر اعظم عمران خان کا کہنا ہے کہ سال 2022بیک وقت بہترین اور بدترین تھا۔ذاتی مفاد میں گُندھی ایک سازش کے ذریعے بہترین معاشی کارکردگی دکھانےوالی حکومت کو ہٹایا گیا اور پاکستان کومجرموں کےایک گروہ کےحوالےکر دیا گیا۔ سماجی رابطے کی سائیٹ ٹویٹر پر پیغام جاری کرتے ہوئے سابق وزیر اعظم کا کہنا تھا کہ گروہ نےملکی معیشت زمیں بوس کی،خود کو این آر او ٹو دیا اور نیب قانون میں ترامیم کے ذریعےتمام وائیٹ کالرکریمینلز کیلئےلوٹ مار کےدروازےکھول دیے۔چیئر مین پی ٹی آئی نے مزید کہا کہ یہ سال بہترین یوں تھا کہ اسی دوران میں نے اہلِ پاکستان کو ایک قوم کےسانچےمیں ڈھلتےدیکھا، الیکشن کمیشن اور مقتدرہ کی مکمل پشتیبانی سے ملک کی تمام سیاسی جماعتوں کےیکجا ہوکرتحریک انصاف کیخلاف صف آراء ہونےکےباوجود تحریک انصاف غیرمعمولی عوامی تائید و حمایت سے 75% ضمنی انتخابات میں فتح یاب رہی اور اس نےخود کوصحیح معنوں میں ایک قومی جماعت کےطور پر منظم کیا۔آجکل قومی منظرنامے پر، خصوصاً دیوالیہ پن کے امکانات کے باعث چھائی مایوسی کے باوجود میرا رب العزت پر ایمان اور اپنی قوم پر اعتماد ہےکہ تحریک انصاف بلاشبہ 2023 میں انتخاب کے ذریعے ایک مضبوط حکومت قائم کرے گی اور پاکستان کو بحرانوں کی اس دلدل، جس میں امپورٹڈ سرکار اور اسکے سرپرستوں نے ملک کو دھکیلا ہے، سے نجات دلوانے کیلئے ٹھوس ڈھانچہ جاتی اصلاحات متعارف کروائے گی۔