ایشیا کپ،پاکستان کا بھارت کیخلاف ٹاس جیت کر فیلڈنگ کا فیصلہ

کولمبو(مانیٹرنگ ڈیسک)ایشیا کپ کے سُپر فور مرحلے کے میچ میں پاکستان نے بھارت کے خلاف ٹاس جیت کر پہلے فیلڈنگ کا فیصلہ کیا ہے۔پاک بھارت میچ دیکھنے کے لیے کولمبو کے اسٹیڈیم میں شائقین کی آمد جاری ہے۔سری لنکا میں آج چھٹی کے روز پریماداسا اسٹیڈیم تماشائیوں سے مکمل بھرنے کا امکان ہے۔دوسری جانب آج پاک بھارت میچ بارش سے متاثر ہونے کا بھی خدشہ ہے، صبح سورج نکل آیا مگر کولمبو میں آج بارش کا 80 فیصد تک امکان ہے، دن کے اوقات میں تیز ہواؤں کے ساتھ بارش کی پیش گوئی کی گئی ہے۔پاک بھارت میچ سے متعلق حوصلہ افزاء بات یہ ہے کہ بارش کے باعث میچ متاثر ہونے کی صورت میں میچ پیر کو کھیلا جائے گا۔آج کے میچ کے لیے پاکستان ٹیم نے بنگلا دیش کے خلاف کھیلنے والے کھلاڑیوں کو ہی ٹیم میں برقرار رکھا ہے۔آج بھارت کے خلاف میچ میں فخر زمان، امام الحق، بابر اعظم، محمد رضوان، شاداب خان، افتخار احمد، سلمان علی آغا، شاہین آفریدی، نسیم شاہ، حارث رؤف اور فہیم اشرف پاکستان ٹیم کا حصہ ہوں گے۔