کراچی ، قائد آباد میں نامعلوم افراد کی فائرنگ، رکشہ ڈرائیور جاں بحق

کراچی(مانیٹرنگ ڈیسک)قائد آباد کے علاقے میں بچوں کی لڑائی کے دوران نا معلوم افراد کی فائرنگ سے ایک رکشہ ڈرائیور موقع پر ہی جاں بحق ہو گیا، لانڈھی مجید کالونی سیکٹر ون میں جھگڑے کے دوران گولی لگنے سے جان کی بازی ہارنے والے رکشہ ڈرائیور کے اہل خانہ نے اعلیٰ حکام سے انصاف فراہم کرنے کا مطالبہ کیا ہے۔مقتول رکشہ ڈرائیورمحسن کے بڑے بھائی راشد نے بتایا کہ اس کے چھوٹے بھائی کوفائرنگ کرکے قتل کردیا گیا ہے۔ بھائی رکشہ لے کر گھر آ رہا تھا کہ بچوں کی لڑائی کے دوران نامعلوم ملزمان کی جانب سے فائرنگ کی گئی، جس نتیجے میں میراچھوٹا بھائی گولی کا نشانہ بن گیا، انہوں نے بتایا کہ جھگڑے کے دوران جب فائرنگ ہوئی تو میرا بھائی وہاں سے بھاگا، اسی دوران پیچھے سے کسی نے فائرنگ کی تو بھائی کو کمرپر ایک گولی لگی جو جان لیوا ثابت ہوئی۔انہوں نے بتایا کہ 3 ماہ قبل مقتول کی اہلیہ کا بھی انتقال ہوا تھا، مقتول ایک بیٹے کا باپ تھا۔