حماس کا دفتر بند کیا نہ رہنمائوں کو ملک چھوڑنے کا کہا ہے،قطر

دوحہ (آئی این پی )قطر کی وزارت خارجہ نے اعلان کیا ہے کہ ان کا ملک اسرائیل اور حماس کے درمیان غزہ جنگ بندی پر مذاکرات کو عارضی طور پر معطل کر رہا ہے۔اسرائیلی میڈیا نے دعوی کیا تھا کہ امریکی سفارت کار نے نام نہ ظاہر کرنے کی شرط پر بتایا ہے کہ قطر نے حماس کے تمام رہنماوں کو ملک بدر کرنے کا بھی فیصلہ کرلیا ہے۔ امریکی میڈیا کا بھی کہنا تھا کہ جوبائیڈن انتظامیہ کے دباو پر قطر نے حماس کے دفاتر بند اور رہنماوں کو ملک چھوڑنے کا حکم دیدیا ہے۔ تاہم قطر کی وزارت خارجہ کے بیان میں ان افواہوں کی سختی تردید کرتے ہوئے کہا ہے کہ اس قسم کی تمام خبریں بے بنیاد اور جھوٹ پر مبنی ہیں۔دوسری جانب اسرائیل نے دھمکی دی ہے کہ قطر کے بعد اب کسی بھی دوسرے ملک کو حماس کے رہنماوں کو اپنے یہاں محفوظ جگہ نہیں دینی چاہیے۔ قبل ازیں قطری وزارت خارجہ کی جانب سے جاری بیان میں کہا گیا کہ جب تک فریقین (حماس اور اسرائیل ) مذاکرات پر آمادگی ظاہر نہیں کرتے۔ ثالثی کا عمل شروع نہیں کریں گے۔بیان میں اس امید کا بھی اظہار کیا گیا تھا کہ فریقین ایک بار پھر بات چیت کے لیے رضامند ہوں گے اور مذاکراتی عمل دوبارہ شروع کیا جائے گا۔