بلوچستان کے معاملے میں نواز شریف اپنا سیاسی کردار ادا کرنے کو تیار ہیں، ڈاکٹر مالک بلوچ

لاہور (انتخاب نیوز) نیشنل پارٹی کے سربراہ ڈاکٹر عبدالمالک بلوچ نے ن لیگ کے سربراہ نواز شریف سے ملاقات کے بعد میڈیا نمائندوں سے گفتگو کرتے ہوئے کہا کہ نواز شریف سے بلوچستان کے مسئلے پر تفصیل سے گفتگو کی ہے۔ نواز شریف کو کہا ہے کہ وہ بلوچستان آئیں اور سیاسی قائدین سے ملاقاتیں کریں۔ نواز شریف بلوچستان کے معاملے میں سیاسی کردار ادا کرنے کیلئے تیار ہیں۔ نواز شریف نے بلوچستان کے معاملے میں اپنا کردار ادا کرنے کی یقین دہانی کرائی ہے۔
لاہور، کوئٹہ (یو این اے) مسلم لیگ(ن) کے قائد میاں نواز شریف سے سابق وزیر اعلیٰ بلوچستان اور نیشنل پارٹی کے سربراہ ڈاکٹر عبدالمالک بلوچ نے اپنی جماعت کے وفد کے ہمراہ جاتی امرا رائیونڈ میں ملاقات کی پارٹی ذرائع کے مطابق جاتی امرا میں ہونے والی اس اہم ملاقات کے موقع پر مسلم لیگ ن کے رہنما اور وفاقی وزرا اویس لغاری، احسن اقبال، پرویز رشید، خواجہ آصف، خواجہ سعد رفیق، احسن اقبال اور سردار اویس لغاری بھی ملاقات میں شامل تھے میاں نواز شریف کی جانب سے ڈاکٹر عبدالمالک بلوچ اور ان کے وفد کے اعزاز میں ظہرانے کا بھی اہتمام کیا گیا۔ دونوں رہنماوں نے ملاقات میں بلوچستان کے حالیہ واقعات، دہشت گردی کی صورتحال پر تبادلہ خیال کیاڈاکٹر عبدالمالک بلوچ نے میاں نواز شریف کو دورہ بلوچستان کی دعوت بھی دی۔ ڈاکٹر عبدالمالک بلوچ نے نواز شریف کو مہنگائی کی رفتار اور بجلی کی قیمتوں میں کمی کرنے پر مبارکباد دی۔ملاقات کے بعد مسلم لیگ ن کے رہنما سعد رفیق کے ہمراہ میڈیا سے گفتگو میں ڈاکٹر عبدالمالک بلوچ نے کہا کہ میں نواز شریف اور لیگی رہنماوں کا مشکور ہوں کہ ہمارے خیرسگالی وفد کو بھرپور احترام دیا، بلوچستان دو دہائیوں سے خون میں رنگا ہوا ہے اور اس دوران نواز شریف کا کردار بہت اہم ہے انہوں نے کہا کہ بلوچستان کے عوام کو نواز شریف سے بہت امیدیں وابستہ ہیں اور انہوں نے نواز شریف سے درخواست کی کہ وہ بی این پی مینگل کے دھرنے اور خواتین کی جیلوں میں موجودگی پر اپنا کردار ادا کریں۔عبدالمالک بلوچ نے کہا کہ نواز شریف نے یقین دہانی کرائی کہ وہ دوبارہ اپنے کردار کو فعال کریں گے۔ انہوں نے یہ بھی کہا کہ بلوچستان کا مسئلہ سیاسی ہے اور اس کا حل سیاسی طور پر ہی ممکن ہے۔ ڈاکٹر عبدالمالک بلوچ نے بے گناہ افراد کے قتل کی مذمت کی۔خواجہ سعد رفیق نے کہا کہ ڈاکٹر عبدالمالک بلوچ نے نواز شریف سے درخواست کی کہ وہ سینئر سیاستدان کے طور پر بلوچستان کے مسائل میں اپنا کردار ادا کریں، نواز شریف نے یقین دہانی کرائی کہ وہ بلوچستان میں امن کے لیے اپنا سیاسی اور جمہوری کردار ادا کریں گے۔سعد رفیق نے کہا کہ جب نواز شریف وزیر اعظم تھے اور ڈاکٹر عبدالمالک بلوچ وزیر اعلی تھے، تب بلوچستان میں ترقی ہوئی تھی۔ بدقسمتی سے جمہوریت میں تعطل آیا جس کی وجہ سے صورتحال یہاں تک پہنچی۔ نواز شریف نے یقین دہانی کرائی کہ وہ ذاتی طور پر اس مسئلے میں دلچسپی لے کر اس کا حل نکالیں گے۔جاتی عمرہ میں میڈیا سے غیر رسمی گفتگو کرتے ہوئے مسلم لیگ (ن)کے رہنما رانا ثنا اللہ نے کہا کہ بانی پی ٹی آئی جب تک سیاستدانوں سے گفتگو نہیں کریں گے، مسئلہ حل نہیں ہو گا، بلوچستان میں پی ٹی آئی اسٹیک ہولڈر نہیں ہے، سیاسی مسائل سیاستدان ہی گفتگو کے ذریعے حل کر سکتے ہیں، تمام سیاسی جماعتیں بیٹھ کر ہی مسائل حل کریں گی۔