قوم پرست جماعتوں کی اپیل پر سندھ میں شٹر ڈاﺅن، پنجاب جانیوالی شاہراہ 3 روز سے بند

کراچی (انتخاب نیوز) دریائے سندھ سے متنازع نہریں نکالنے کیخلاف قوم پرست جماعتوں کی جانب سے سندھ میں شٹر ڈاﺅن ہڑتال، کئی شہروں میں کاروباری مراکز بند اور سڑکوں پرٹریفک معمول سےکم ہے، وکلا کاخیرپور میں دھرنا 3 روز سے جاری ہے جس کے باعث سندھ سے پنجاب سمیت دیگر صوبوں کوجانے والا ٹریفک بند ہے جبکہ قوم پرست جماعتوں کے کارکنوں نے دھرنا دے کر ریلوے ٹریک بھی بند کردیا۔ دریائے سندھ سے متنازع نہریں نکالنے کیخلاف قوم پرست جماعتوں کی کال پر آج سندھ بھر میں شٹر ڈاﺅن ہڑتال کی جارہی ہے۔ جامشورو، کوٹری، نوشہروفیروز، کندھکوٹ، خیرپور، جیکب آباد سمیت سندھ کے مختلف شہروں میں کاروباری مراکز اور مارکیٹیں بند ہیں جبکہ سڑکوں پر ٹریفک کی روانی معمول سے کم ہے۔ خیر پور میں قوم پرست جماعتوں کے کارکنوں نے ریلوے ٹریک پر دھرنا دے دیا، دھرنے کے باعث اپ اور ڈاﺅن ٹریکس کو بند کردیا۔ مشتعل مظاہرین نے لاہور سے کراچی آنے والی عوام ایکسپریس کو روک لیا۔ دوسری جانب خیرپور میں ببرلو بائی پاس پر وکلا کا تین دن سے دھرنا جاری ہے، مرکزی شاہراہ پر جاری احتجاج میں وکلا کے ساتھ قوم پرست جماعتوں کے کارکن، ادیب، شعرا، دانشور اور خواتین کی بڑی تعداد شریک ہے۔ پنجاب جانے والی شاہراہ 3 دن سے بند ہونے کے باعث گاڑیوں کی طویل قطاریں لگ گئیں۔