بھارت میں بلاول بھٹو زرداری کا ایکس اکاﺅنٹ بلاک کردیا گیا

کراچی (مانیٹرنگ ڈیسک) بھارت میں بلاول بھٹو زرداری کا ایکس اکاونٹ بلاک کردیا گیا۔ پیپلز پارٹی کی سینئر رہنما سینیٹر شیری رحمن نے بلاول بھٹو کے ایکس اکاﺅنٹ کی بندش کی شدید مذمت کرتے ہوئے کہا ہے کہ بھارت نے پہلگام واقعے کا الزام تو پاکستان پر دھر دیا، مگر سچائی سامنے آنے پر مودی سرکار اب سخت گھبراہٹ کا شکار ہے۔ انہوں نے کہا کہ پہلگام واقعے کے بعد بھارتی اقدامات پاکستانی موقف کو تقویت دے رہے ہیں، مودی سرکار سن لو، آوازیں دبانے سے سچ چھپتا نہیں۔ شیری رحمن نے کہا کہ بلاول پاکستان کے عوام کی آواز ہیں، ان کا اکاﺅنٹ بلاک کرنا بھارت کے جھوٹ کو بے نقاب کرتا ہے۔ انہوں نے مزید کہا کہ بھارت کے پاس فیس سیونگ کا کوئی راستہ نہیں بچا، بھارت کو شواہد پیش کرنے چاہیئں نہ کہ سنسر شپ کا راستہ اپنائے۔ شیری رحمن نے کہا کہ تنقیدی آوازوں کو دبانے کی کوششیں نہ صرف پاکستان بلکہ عالمی سطح پر تشویش کو بڑھا رہی ہیں۔