بایو فورٹیفائیڈ فصلوں کو مقامی زرعی نظام میں شامل کیا جائے، سماجی تنظیم (HOPE) بلوچستان کے زیراہتمام ڈائیلاگ کا انعقاد

کوئٹہ (پ ر) سماجی تنظیم (HOPE) بلوچستان کے زیراہتمام جھل مگسی میں "بائیو فورٹیفائیڈ اسٹیپل کراپس” کے حوالے سے راؤنڈ ٹیبل ڈائیلاگ کا انعقاد کیا گیا، جس میں زرعی ماہرین، تحقیقی ادارے، سرکاری محکمے، این جی اوز اور مقامی کمیونٹی کے نمائندوں نے شرکت کی۔ مکالمے کا مقصد غذائی قلت کے خاتمہ، خوراک اور نیوٹریشن سیکیورٹی میں بہتری کے لیے بائیو فورٹیفائیڈ فصلوں کو فروغ دینا اور ان کی پیداوار کو بڑھانا تھا۔جس میں محکمہ زراعت توسیع، ایگریکلچر یونیورسٹی، ڈائریکٹوریٹ آف ریسرچ ویجیٹیبل سیڈ پروڈکشن، ایگریکلچر آفس جھل مگسی اور دیگر متعلقہ محکموں کے نمائندوں نے شرکت کی۔ مکالمے ضلع میں کام کرنے والی این جی اوز، پروجیکٹ کے شرکاء اور کمیونٹی کے افراد بھی بڑی تعداد میں موجود تھے۔زرعی ماہرین نے بائیو فورٹیفائیڈ فصلوں کی غذائی اہمیت، مائیکرونیوٹرینٹس کی کمی کو کم کرنے میں ان کے کردار، اور جدید کاشتکاری طریقوں پر تفصیلی معلومات فراہم کیں۔ مکالمے کا خاص پہلو "اکبر-19” بائیو فورٹیفائیڈ گندم پر گفتگو تھا، جس کے کاشتکاروں نے زیادہ پیداوار، بہتر دانے کے معیار اور کمیونٹی میں مثبت قبولیت کے اپنے تجربات شیئر کیے۔ماہرین نے زور دیا کہ بایو فورٹیفائیڈ فصلوں کو مقامی زرعی نظام میں شامل کیا جائے اور سرکاری اداروں، تعلیمی اداروں، این جی اوز اور کسانوں کے درمیان قریبی تعاون کو فروغ دے کر اس کے پائیدار اثرات کو یقینی بنایا جائے۔یہ اقدام (HOPE) کے اس عزم کا حصہ ہے کہ وہ غذائی قلت اور فوڈ سیکیورٹی کے مسائل کے حل کے لیے جدید اور مؤثر زرعی اقدامات کو فروغ دے کر کسانوں کو بااختیار بنائے اور کمیونٹی کی صحت بہتر بنائے۔