پاکستان کی جانب سے فلسطینیوں کیلئے 100 ٹن امدادی سامان کی کھیپ روانہ

اسلام آباد (انتخاب نیوز) وفاقی حکومت کی جانب سے غذائی قلت کا شکار فلسطینیوں کے لیے 100 ٹن امدادی سامان روانہ کردیا گیا۔ نائب وزیراعظم و وزیر خارجہ اسحاق ڈار اور چیئرمین نیشنل ڈیزاسٹر مینجمنٹ اتھارٹی (این ڈی ایم اے) نے امدادی سامان کی 17ویں کھیپ روانہ کی۔ 100 ٹن امدادی سامان میں خوراک، خشک دودھ، تیار کھانے اور طبی آلات شامل ہیں۔ اس موقع پر وزیر خارجہ اسحاق ڈار نے کہا کہ غزہ میں قحط سے چھوٹے چھوٹے بچے شہید ہورہے ہیں، اسرائیل خوراک کو بطور ہتھیار استعمال کررہا ہے۔ انہوں نے کہا کہ مظلوم فلسطینیوں تک اشیائے ضروریہ کی بغیر رکاوٹ ترسیل چاہتے ہیں، امدادی سامان کیلئے تعاون پر الخدمت فاﺅنڈیشن کے شکر گزار ہیں۔