مقامی بارڈر کراسینگ پر عارضی بندش تیل کی آڑ میں بارودی مواد کی ترسیل کا سدباب کرنے کے لئے لگائی گئی ہے، آئی جی ایف سی ساوتھ

دالبندین(این این آئی)آئی جی ایف سی ساوتھ، میجر جنرل بلال سرفرازنے جمعہ کودالبندین کا خصوصی دورہ کیاجس میں انہوں نے قبائلی مشران ،عمائدین،ضلع انتظامیہ اور پولیس کے اعلی عہدیداروں سے ملاقات کی اور مقامی مور پر تبادلہ خیال کیا۔اس موقع پر گفتگو کرتے ہوئے آئی جی ایف سی ساوتھ، میجر جنرل بلال سرفراز نے واضح کیاکہ ضلع چاغی میں امن حکومت ،سیکیورٹی اداروں اور علاقے کے معززین کی باہمی ذمہ داری ہے۔پائیدار امن کے تسلسل کے لئےقبائلی معتبرین اپنا مثبت کردار بھر پور طریقے سے ادا کرتے رہیں۔ آئی جی ایف سی ساو?تھ نے ضلع چاغی کے مقامی عمائدین کی امن برقرار رکھنے کی کوششوں کو بھی سراہا۔ کپٹن وقار کاکڑ (شہید) کی دشت میں شہادت کا ذکر کرتے ہوئے کہاکہ وہ ایک بہادر اور غیور بلوچ آفسر تھے جو فتنہ الخوارج کے حالیہ بزدلانہ حملے میں شہید ہوئے۔ آئی جی ایف سی ساوتھ نے واضح کیا کہ ایف سی اور دیگر قانون نافذ کرنے والے ادارے شرپسندوں اور ان کے سہولت کاروں کے خلاف مشترکہ ٹارگٹڈ آپریشن جاری رکھیں گے۔ ان اقدامات کا مقصد علاقے میں پائیدار امن کو یقینی بنانا ہے۔ اسی تسلسل میں ا±نہوں نے بتایا کہ فتنہ الخوارج اپنے ناپاک عزائم اور بزدلانہ حملوں کی تکمیل کے لئے دھماکہ خیز مواد کا استعمال کررہاہے۔جس کی وجہ سے نا صرف سیکیورٹی اداروں بلکہ معصوم اور قیمتی بلوچ جانوں کا نقصان ہو رہا ہے۔ مختلف تیل کی بارڈر کراسینگ سے دھماکہ خیز مواد کی ترسیل کے ناقابل تردید شواہد ملے ہیں۔ اس بنا پر کچھ عرصے کے لئے تیل کی بارڈر کراسینگ کو بند کیاگیا تھا تاکہ کراسینگ کو محفوظ بناکر مقامی لوگوں کے لئے کھولا جاسکے۔ مزید ازاں راجے بارڈر کراسنگ کو ترجیحی بنیادوں پر دوبارہ کھولنے کی کاوش جاری ہے۔جس حوالے سے اس مہینے میں مثبت پیشرفت متوقع ہے۔ صرف تیل کی مقامی تر سیل و تجارت کو ممکن بنانے کے لئے جدید اسکینرز نصب کیے جا رہے ہیں۔ فتنہ الخوارج کی تمام بارڈر کراسینگ کی بندش کے بیانیے کی تردید کرتے ہوئے واضح کیا کہ تمام باضابطہ نوٹیفائیڈتجارتی اور راہداری بارڈر کراسینگ کھلی ہیں اور روزمرہ استعمال میں ہیں مزید کتاگر رہداری کراسینگ بھی انشاءاللہ جلد کھول دیا جائے گی۔• ترقیاتی منصوبوں کے حوالے سے بتایا گیا کہ ضلع چاغی کے لئے بلوچستان سپیشل ڈیویلپمنٹ انیشیٹیو کے تحت 411 ملین روپے مالیت کے ترقیاتی منصوبے منظور کیے گئے ہیں، جن کے فنڈز براہِ راست ضلعی انتظامیہ کو فراہم کیے جا رہے ہیں تاکہ منصوبوں پر فوری عملدرآمد ممکن ہو سکے۔انہوں نے مزید کہا کہ علاقے کے ناخواندہ افراد کو چاہیے کہ وہ اسکل ڈویلپمنٹ سینٹرز سے فائدہ اٹھائیں اور تکنیکی ہنر سیکھ کر علاقے میں مو جود روزگار کے باعزت مواقعوں سے فائدہ اٹھائیں۔