کوئٹہ میں بلدیاتی انتخابات کیلئے کاغذات نامزدگی جمع کرانے کا آغاز، امیدواروں کی ابتدائی فہرست 18 نومبر کو شائع ہوگی
کوئٹہ (ویب ڈیسک) کوئٹہ میں بلدیاتی انتخابات کا عمل شروع ہوگیا ۔ کاغذات نامزدگی 13 سے 17 نومبر 2025ءتک متعلقہ ریٹرننگ افسران کے پاس جمع کرائے جا سکیں گے۔ ترجمان الیکشن کمیشن کوئٹہ کے مطابق امیدواروں کی ابتدائی فہرست 18 نومبر کو شائع ہوگی۔ کاغذات نامزدگی کی جانچ پڑتال 19 سے 24 نومبر تک ہوگی۔ ریٹرننگ افسران کی جانب سے کاغذات نامزدگی منظور یا مسترد ہونے کے خلاف اپیلیں اپیلیٹ ٹریبونل کے پاس دائر کرنے کی آخری تاریخ 28 نومبر ہے۔ ان پر فیصلے کی آخری تاریخ 3 دسمبر مقرر کی گئی ہے۔ امیدواروں کی نظرثانی شدہ فہرست 4 دسمبر کو اور دست برداری و حتمی فہرست 5 دسمبر کو کو شائع ہوگی۔ انتخابی نشان کی شیڈول کے تحت امیدواروں کو الاٹمنٹ 6 دسمبر کو ہوگی۔ پولنگ اتوار 28 دسمبر 2025ءکو اور نتائج کی تکمیل 31 دسمبر 2025ءکو کی جائے گی۔ پولنگ کے اوقات صبح 8 بجے سے شام 4 بجے تک مقرر کیے گئے ہیں۔
