سلامتی کونسل میں ٹرمپ کے غزہ امن منصوبے سے متعلق قرارداد کی منظوری، روس اور چین نے ووٹنگ میں حصہ نہیں لیا

نیویارک (مانیٹرنگ ڈیسک) سلامتی کونسل میں امریکا کی غزہ امن قرارداد پر چین اور روس نے شدید تحفظات کا اظہار کرتے ہوئے کہا کہ غزہ صرف فلسطینی عوام کا ہے کسی اور کا نہیں۔ دونوں ممالک کا کہنا ہے کہ امریکی قرارداد فلسطینیوں کے کردار، شفافیت اور استحکام فورس کے اختیارات سے متعلق اہم نکات واضح نہیں ہیں۔ چینی سفیر فو کونگ نے کہا کہ قرارداد فلسطینی حکمرانی کے اصولوں کی عکاسی نہیں کرتی اور امریکا نے انٹرنیشنل اسٹیبلائزیشن فورس اور بورڈ آف پیس کی تفصیلات فراہم نہیں کی۔ روسی مندوب کے مطابق یہ منصوبہ فلسطینیوں کو عمل سے باہر رکھتا ہے اور غزہ و مغربی کنارے کی مزید تقسیم کا خطرہ پیدا کرتا ہے۔ برطانیہ، فرانس، جنوبی کوریا اور سلووینیا نے منصوبے کی تائید کی جبکہ ڈنمارک نے زور دیا کہ غزہ اور مغربی کنارے کو متحد رکھنا ضروری ہے۔ یاد رہے کہ اقوام متحدہ کی سلامتی کونسل نے امریکی صدر ڈونلڈ ٹرمپ کے غزہ امن منصوبے سے متعلق قرارداد کی منظوری دی ہے، قرار داد کے حق میں 14 ووٹ آئے جبکہ مخالفت میں کوئی ووٹ نہیں آیا، روس اور چین نے ووٹنگ کے عمل میں حصہ نہیں لیا۔ امریکی مندوب نے سلامتی کونسل میں پاکستان، مصر، قطر، اردن، سعودی عرب، یواے ای، ترکیے اور انڈونیشیا سے تشکر کا اظہار کیا۔