پاکستان کی وائٹ بال کپتان بابر اعظم کا ایک اور ریکارڈ
پاکستان کی وائٹ بال ٹیم کے کپتان بابر اعظم رواں سال سب سے زیادہ ٹی ٹوئنٹی رنز بنانے والے بیٹسمین بن گئے۔راولپنڈی کے کرکٹ اسٹیڈیم میں پیر کو بابر اعظم نے ناقابل شکست 64 رنز اسکور کیے جس کے ساتھ ہی وہ رواں سال سب سے زیادہ ٹی ٹوئنٹی رنز بنانے والے بیٹسمین بن گئے۔رواں سال بابر اعظم کے مجموعی رنز کی تعداد 942 ہوگئی جب کہ انگلینڈ کے ایلکس ہیلز نے سال میں اب تک 895 رنز بنائے ہیں۔آسٹریلیا کے مارکس اسٹوئنس 809 رنز بناکر تیسرے نمبر پر ہیں۔اس سال پاکستان کی جانب سے نمایاں رنز بنانے والوں میں دوسرا نمبر شعیب ملک کا ہے جنہوں نے 2020 میں اب تک 703 رنز بنائے ہیں جب کہ محمد حفیظ نے 684 رنز اسکور کیے۔ بابر اعظم نے اس سال اب تک 8 نصف سنچریاں اور ایک سنچری اسکور کیں۔ یوں وہ نو ففٹی پلس اسکورز کے ساتھ اس فہرست میں بھی پہلی پوزیشن پر ہیں۔پاکستان وائٹ بال ٹیم کپتان اس سال ٹی ٹوئنٹیز میں سب سے زیادہ چوکے لگانے والے بیٹسمین بھی ہیں۔انہوں نے رواں سال اب تک 108 چوکے لگائے جب کہ کوئی دوسرا کھلاڑی 100 چوکے بھی نہ لگاسکا ہے۔خیال رہے کہ گزشتہ برس بھی بابر اعظم ٹی ٹوئنٹی میچز میں سب سے زیادہ رنز بنانے والے بیٹسمین تھے اور انہوں نے 39 اننگز می٘ں 1607 رنز بنائے تھے۔حیرت انگیز طور پر اس سال سب سے زیادہ ٹی ٹوئنٹی وکٹیں بھی پاکستانی کے پاس ہیں اور شاہین شاہ آفریدی 39 وکٹیں لے کر اس فہرست میں سب سے اوپر ہیں۔