گوگل نے انوشکا شرما کو افغان کرکٹر کی بیوی بنادیا
دنیا کی سب سے بڑے انٹرنیٹ سرچ انجن ’گوگل‘ نے معروف بولی وڈ اداکارہ اور بھارتی کرکٹر ویرات کوہلی کی اہلیہ انوشکا شرما کو افغان کرکٹر راشد خان کی بیوی بنادیا۔
بھارتی اخبار انڈیا ٹوڈے کے مطابق گوگل کے الگورتھم میں غلطی کی وجہ سے 10 اکتوبر 2020 کے بعد گوگل نے بھارتی اداکارہ کو افغان کرکٹر راشد خان کی بیوی بنا کر پیش کیا۔
رپورٹ کے مطابق جیسے ہی کوئی شخص گوگل پر ’راشد خان کی اہلیہ‘ سرچ کرتا ہے تو گوگل اس کے سامنے انوشکا شرما کو افغان کرکٹر کی بیوی بناکر اس کا تعارف پیش کرتا ہے۔
اسی حوالے سے ہندوستان ٹائمز نے بھی اپنی رپورٹ میں بتایا کہ بظاہر گوگل کے الگورتھم میں غلطی کی وجہ سے ہی انوشکا شرما کو انٹرنیٹ پر افغان کرکٹر کی بیوی بناکر پیش کیا جا رہا ہے۔
عام افراد کی جانب سے 10 اکتوبر سے لے کر 12 اکتوبر تک گوگل پر افغان کرکٹر ’راشد خان کی اہلیہ‘ کا جملہ لکھ کر جیسے ہی سرچ شروع کی گئی تو گوگل نے 3 سیکنڈز سے بھی کم دورانیے میں انوشکا شرما کو افغان کرکٹر کی بیوی بناکر پیش کیا۔
