ایف بی آر نے تفتان ریلوے اسٹیشن کو کسٹمز اسٹیشن کا درجہ دے دیا

کوئٹہ (این این آئی ) پاکستان کے فیڈرل بورڈ آف ریونیو (ایف بی آر) نے باضابطہ طور پر تفتان بارڈر ریلوے اسٹیشن کو درآمدی و برآمدی کسٹمز کارروائیوں کے لیے لینڈ کسٹمز اسٹیشن قرار دے دیا ہے۔ اس اقدام سے ریل کے ذریعے مال برداری میں سہولت، نقل و حمل کے اخراجات میں کمی اور ایران و پاکستان کے درمیان رسمی تجارت کو فروغ ملنے کی توقع ہے۔اسلامی جمہوریہ ایران ریلوے کے مطابق، یہ فیصلہ ایران اور پاکستان ریلوے کے سربراہان کے درمیان ٹیلی فونک رابطے اور تفتان ریلوے کراسنگ کو فعال کرنے کے لیے سرکاری مراسلت کے بعد کیا گیا۔ایف بی آر کے جاری کردہ نوٹیفکیشن کے تحت 11.75 ہیکٹر پر مشتمل تفتان ریلوے اسٹیشن کو درآمدی و برآمدی سامان کی لوڈنگ، ان لوڈنگ، کسٹمز کلیئرنس اور دیگر کارروائیوں کی اجازت دے دی گئی ہے۔ اس کے ساتھ ہی کسٹمز اسٹیشن کی جغرافیائی حدود بھی متعین کر دی گئی ہیں، جس سے تفتان ریلوے ٹرمینل باضابطہ طور پر پاکستان کے کسٹمز نیٹ ورک کا حصہ بن گیا ہے۔تفتان، ایران کے ساتھ پاکستان کی اہم زمینی سرحدی گزرگاہ ہے، جو طویل عرصے سے اسٹریٹجک اہمیت کی حامل رہی ہے، تاہم بنیادی ڈھانچے کی کمی اور مکمل کسٹمز سہولیات نہ ہونے کے باعث یہ اپنی مکمل استعداد کے مطابق فعال نہیں ہو سکی۔ماہرین کے مطابق ریلوے کسٹمز اسٹیشن کے قیام سے ریل کے ذریعے سامان کی نقل و حمل آسان ہوگی، ٹرانسپورٹ کے اخراجات کم ہوں گے، کسٹمز کلیئرنس کا عمل تیز ہوگا اور سرحد پار تجارت کو مزید منظم بنانے میں مدد ملے گی۔اس اقدام سے اسمگلنگ اور غیر رسمی تجارتی راستوں کی حوصلہ شکنی بھی ہوگی، کیونکہ دستاویزات، معائنہ اور کسٹمز کلیئرنس کے عمل کو مزید مو¿ثر بنایا جائے گا، جس سے تاجروں کو رسمی تجارتی ذرائع استعمال کرنے کی ترغیب ملے گی۔فیڈرل بورڈ آف ریونیوکی جانب سے تفتان ریلوے اسٹیشن کو لینڈ کسٹمز اسٹیشن قرار دیے جانے کے بعد انتظامات کا آغاز کر دیا گیا، جبکہ مقامی تاجروں نے اس اقدام کو ایران اور پاکستان کے درمیان تجارت کے فروغ کے لیے اہم پیش رفت قرار دیا ہے۔کوئٹہ چیمبر آف کامرس اینڈ انڈسٹریز کے رہنماﺅں کا کہنا تھا کہ ایف بی آر کی جانب سے تفتان ریلوے اسٹیشن کو لینڈ کسٹمز اسٹیشن قرار سے سامان کی ترسیل میں آسانی، ٹرانسپورٹ لاگت میں کمی اور سرحد پار تجارت کو فروغ ملے گا، تاہم مو¿ثر عملدرآمد کے لیے ضروری انفراسٹرکچر، کسٹمز عملے اور دیگر سہولیات کی بروقت فراہمی بھی ناگزیر ہے۔ دوسری جانب ایف بی آر نے تفتان ریلوے اسٹیشن کو درآمدی و برآمدی سامان کی لوڈنگ، ان لوڈنگ اور کسٹمز کلیئرنس کے لیے باضابطہ منظوری دے دی ہے، جس کے بعد تفتان ریلوے ٹرمینل پاکستان کے کسٹمز نیٹ ورک کا حصہ بن گیا ہے۔