عمران خان ادویات کی قیمتوں میں 500 فیصد اضافہ کرچکے ہیں، مریم اورنگزیب

اسلام آباد :پاکستان مسلم لیگ (ن) کی ترجمان مریم اورنگزیب کہتی ہیں کہ تین سال میں عمران خان صاحب ادویات کی قیمتوں میں 500 فیصد اضافہ کرچکے ہیں۔

مریم اورنگزیب نے جان بچانے سمیت دیگر ادویات کی قیمتوں میں ہوشربا اضافہ واپس لینے کا مطالبہ کرتے ہوئے کہا ہے کہ عمران صاحب جان بچانے والی دوائیاں مہنگی کرکے اب کہیں گے کہ جہاد کیا ہے ، عمران خان نے 12 ویں دفعہ دوائی کی قیمتوں میں اوسط 50 فیصد اضافہ کردیا ہے۔

ان کا کہنا تھا کہ عمران صاحب نے جان بچانے والی ادویات بھی مزید مہنگی کردیں ہیں ، عمران صاحب غریبوں کے حق میں ایک تقریر کردیں۔

انہوں نے کہا کہ شوگر کے مریضوں کی دوائی اور انسولین میں ظالمانہ اضافہ کیا گیا ہے جبکہ دوائی چوری میں رنگے ہاتھوں پکڑے جانے والے وزیر کو عمران صاحب نے این آر او دے دیا ہے۔

مریم اورنگزیب کا مزید کہنا تھا کہ آٹا، چینی، بجلی، دوائی ،گیس اور پٹرول کے ستائے عوام صحت وعلاج کی بنیادی سہولت سے بھی محروم ہوچکے ہیں ، عمران خان عوام کو سستی روٹی اور نہ ہی سستی ادویات دے سکے ہیں۔

انہوں نے مزید بتایا کہ کمرے میں بیٹھ کر الیکٹرانک ووٹنگ مشینوں کا معائینہ کریں کیونکہ عمران صاحب کا عوام سے تو کوئی سروکار ہے نہیں ہے کیونکہ ان کو ووٹ عوام سے نہیں مشینوں سے لینے ہیں۔